កំពង់ចាមៈ ជនសង្ស័យចំនួន០៩នាក់ ត្រូវបានកម្លាំងកងរាជអាវុធហត្ថខេត្តកំពង់ចាម សហការជាមួយកម្លាំងមូលដ្ឋាន កងរាជអាវុធហត្ថក្រុងបាត់ដំបង បានធ្វើការឃាត់ខ្លួន មានជាប់ពាក់ព័ន្ធជាមួយករណីរក្សាទុក និងចែកចាយនូវសារធាតុញៀន។

នេះបើតាមការឱ្យដឹងពី មន្ត្រីកងរាជអាវុធហត្ថខេត្តកំពង់ចាម បានប្រាប់ភ្នាក់ងារ GRK News ឱ្យដឹងថា ជនសង្ស័យទាំង០៨នាក់ ដែលត្រូវបាន កម្លាំងកងរាជអាវុធហត្ថ ធ្វើការឃាត់ខ្លួននោះ គឺធ្វើឡើងជា០៣លើក ដោយប្រតិបត្តិការលើទី០១ គឺធ្វើឡើងនៅវេលាម៉ោង ១៦ និង២០នាទី ថ្ងៃទី២៤ ខែកុម្ភៈ ឆ្នាំ២០១៧ ដោយធ្វើការឃាត់ខ្លួនបានជនសង្ស័យចំនួន០២នាក់ ស្ថិតនៅចំណុចភូមិបឹងកុក២ សង្កាត់បឹងកុក ក្រុងកំពង់ចាម ដែលជនសង្ស័យទាំង០២នាក់នោះរួមមានឈ្មោះៈ
១. ថុល ដានី ហៅទីន ភេទប្រុស អាយុ២០ឆ្នាំ មានទីលំនៅភូមិទី១៤ ឃុំជុប ស្រុកត្បូងឃ្មុំ ខេត្តត្បូងឃ្មុំ
២. ធឹម ស្រីលីន ភេទស្រី អាយុ១៧ឆ្នាំ ត្រូវជាគូរដណ្ដឹង ស្នាក់នៅភូមិទី៧ សង្កាក់វាលវង់ ក្រុងកំពង់ចាម និងបានធ្វើការចាប់យកវត្ថុតាងមួយចំនួនរួមមានៈ
១. ថ្នាំញៀនប្រភេទម៉ាទឹកកក ចំនួន០១កញ្ចប់
២. ទូរស័ព្ទដៃ ចំនួន០២គ្រឿង
៣. ដាវសាម៉ូរ៉ៃ ចំនួន០២ដើម
៤. ថង់ផ្លាស់ស្ទិច រួមទាំងឧបករណ៍សំរាប់ប្រើបាស់គ្រឿងញៀនមួយចំនួន។

បន្ទាប់ពីធ្វើការឃាត់ខ្លួនរួចមក ជនសង្ស័យទាំង០២នាក់នោះ ត្រូវបានបញ្ចូនទៅបញ្ជាការដ្ឋានខេត្ត ដើម្បីបន្តធ្វើការសាកសួរ។

បន្ទាប់ពីធ្វើការសាកសួររួចមក ជនសង្ស័យបានឆ្លើយសារភាពថា រូបគេតែងតែយកថ្នាំញៀនទៅចែកចាយនៅចំណុចកើតហេតុខាងលើ។ បន្ទាប់ពីទទួលបានចម្លើយសារភាពរួចមក កម្លាំងកងរាជអាវុធហត្ថខេត្តកំពង់ចាម បានប្រើវិធានការញ៉ុះញ៉ង់ ដោយអោយជនសង្ស័យទាំង០២នាក់នោះ ទៅចាំនៅកន្លែងកើតហេតុ ដើម្បីរង់ចាំអតិថិជនរបស់ខ្លួនមកទិញ។

រង់ចាំមួយសន្ទុះក្រោយមក ក៏មានជនសង្ស័យចំនួន០៤នាក់ បានមកទិញថ្នាំញៀនយកមកប្រើប្រាស់ ប៉ុន្តែត្រូវបានកម្លាំងកងរាជអាវុធហត្ថបានធ្វើការឃាត់ខ្លួនភ្លាមៗ ដែលជនសង្ស័យទាំង០៤នាក់នោះ រួមមានឈ្មោះ ៈ
១. នៅ វិចិត្រ ភេទប្រុស អាយុ២៣ឆ្នាំ ភូមិជីរោទី ឃុំជីរោទី១ ស្រុកត្បូងឃ្មុំ ខេត្តត្បូងឃ្មុំ
២. ហៃ ប៊ុនថេត ភេទប្រុស អាយុ៣០ឆ្នាំ រស់នៅភូមិទី៦ សង្កាត់វាលវង់ ក្រុងកំពង់ចាម
៣. ង៉ែត ភក្រា. ភេទប្រុស អាយុ១៨ឆ្នាំ នៅភូមិទី៧ សង្កាក់វាលវង់ ស្រុកកំពង់ចាម
៤. .ប៉ក់ ម៉ៅ ភេទប្រុស អាយុ១៩ឆ្នាំ រស់នៅភូមិទី៧ សង្កាក់វាលវង់ ស្រុកកំពង់ចាម និងបានធ្វើការចាប់យកវត្ថុតាងមួយចំនួនរួមមានៈ
១. ម៉ូតូ ចំនួន០២គ្រឿង
២. ទូរស័ព្ទដៃ ចំនួន០២គ្រឿង។

បន្ទាប់ពីធ្វើការឃាត់ខ្លួនរួចមក ជនសង្ស័យទាំង០៤នាក់នោះ រួចមក កម្លាំងកងរាជអាវុធហត្ថ ក៏បានពួនស្ទាក់ចាប់ជនសង្ស័យជាបន្តទៀត ពេលនោះ ក៏មានជនសង្ស័យចំនួន០៣នាក់ទៀត បានមកទិញថ្នាំញៀនយកទៅប្រើប្រាស់ ពេលនោះត្រូវបានកម្លាំងកងរាជអាវុធហត្ថធ្វើការឃាត់ខ្លួនភ្លាមៗ។

មន្ត្រីកងរាជអាវុធហត្ថខេត្តកំពង់ចាម បានបញ្ជាក់ឱ្យដឹងទៀតថា ជនសង្ស័យ០៣នាក់ ដែលត្រូវបានកម្លាំងកងរាជអាវុធហត្ថធ្វើការឃាត់ខ្លួននោះរួមមានឈ្មោះៈ
១.ទឹម លក្ខ័ ភេទប្រុស អាយុ២៦ឆ្នាំ រស់នៅភូមិបឹងស្នាយ សង្កាត់សំបួមាស ក្រុងកំពង់ចាម
២. ស្រង វិចិត្រ ភេទប្រុស អាយុ២១ឆ្នាំ រស់នៅភូមិបឹងស្នាយ សង្កាត់សំបួមាស ក្រុងកំពង់ចាម
៣. ហៃប៊ុន ថេន ភេទប្រុស អាយុ៣០ឆ្នាំ រស់នៅភូមិព្រែកតាគង់ សង្កាត់ចាក់អង្រែលើ ខ័ណ្ឌមានជ័យ រាជធានីភ្នំពេញ។

មន្ត្រីដដែល បានបញ្ជាក់ឱ្យដឹងទៀតថា ក្នុងការឃាត់ខ្លួនជនសង្ស័យខាងលើនេះផងដែរ កម្លាំងកងរាជអាវុធហត្ថ ក៏បានធ្វើការចាប់យកវត្ថុតាងមួយចំនួនពីជនសង្ស័យរួមមាន ម៉ូតូ ចំនួន០១គ្រឿង និងទូរស័ព្ទដៃ ចំនួន០២គ្រឿងផងដែរ។

ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្ត តាមនីតិវិធី។

(អត្ថបទៈ ម៉ាន់ ដាវីត)