សៀមរាបៈ នៅវេលាម៉ោង១៤ និង៣០នាទីរសៀល ថ្ងៃទី០៧ ខែមីនា ឆ្នាំ២០១៧ កម្លាំងកងរាជអាវុធហត្ថខេត្តសៀមរាប សហការជាមួយ កម្លាំងមូលដ្ឋាន កងរាជអាវុធហត្ថក្រុងសៀមរាប បានធ្វើការឃាត់ខ្លួន ជនសង្ស័យចំនួន០៩នាក់ ក្នុងនោះមានស្រីចំនួនម្នាក់ ស្ថិតនៅចំណុចភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប មានជាប់ពាក់ព័ន្ធជាមួយករណីរក្សាទុក និងចែកចាយនូវសារធាតុញៀន។

នេះបើតាមការឱ្យដឹងពី មន្ត្រីកងរាជអាវុធហត្ថខេត្តសៀមរាប បានប្រាប់ភ្នាក់ងារ GRK News ឱ្យដឹងថា ជនសង្ស័យខាងលើនេះ គឺត្រូវបាន កម្លាំងកងរាជអាវុធហត្ថខេត្តសៀមរាប បានសហការ តាមដាននូវសកម្មភាពរបស់បក្ខពួកជនសង្ស័យខាងលើនេះ ជាយូរមកហើយ នឹងដោយបានប្រើប្រាស់វិធានការបង្កប់ខ្លួនចូលក្នុងសំបុកក្រុមនោះតែម្តង ទើបអាចឈានទៅដល់ការឃាត់ខ្លួនបានជនសង្ស័យទាំងក្រុមនេះ។

មន្ត្រីដដែល បានបញ្ជាក់ឱ្យដឹងទៀតថា ក្នុងការឃាត់ខ្លួនជនសង្ស័យខាងលើនេះផងដែរ កម្លាំងកងរាជអាវុធហត្ថ ក៏បានធ្វើការចាប់យកវត្ថុតាងមួយចំនួនពីជនសង្ស័យរួមមានៈ
១. ថ្នាំញៀនប្រភេទម៉ាទឹកកក ចំនួន៣០កញ្ចប់ ដែលមានទម្ងន់ ៥.០៧ក្រាម
២.ទូរស័ព្ទដៃ ចំនួន០៨គ្រឿង។

ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្ត តាមនីតិវិធី។

(អត្ថបទ ម៉ាន់ ដាវីត)