បន្ទាយមានជ័យៈ ឃាត់ខ្លួនជនសង្ស័យម្នាក់ ពាក់ព័ន្ធជាមួយករណី លូកលាន់ស្ត្រីរងគ្រោះ លើរថយន្តក្រុង ខណៈនៅពេលនាងកំពុងដេកលក់។

ជនសង្ស័យ ដែលត្រូវបានឃាត់ខ្លួននោះមានឈ្មោះ កេត ស៊ីលា ភេទប្រុស អាយុ២៩ឆ្នាំ រស់នៅភូមិត្នោតជ្រុំ សង្កាត់បឹងទំពន់ ខណ្ឌមានជ័យ រាជធានីភ្នំពេញ។

លោកវរសេនីយ៍ឯក ស ប៊ុនសឿង មេបញ្ជាការរង កងរាជអាវុធហត្ថខេត្តបន្ទាយមានជ័យ ទទួលការងារបទល្មើសជួញដូរមនុស្ស និងការពារអនីតិជន បានប្រាប់ឲ្យដឹងថា កម្លាំងកងរាជអាវុធហត្ថខេត្ត បានទទួលពាក្យបណ្តឹងពីស្ត្រីរងគ្រោះឈ្មោះ ធ.គ.ន អាយុ២៣ឆ្នាំ(មានមុខរបបុគ្គលិកពេទ្យគ្លីនិក) រស់នៅភូមិ១ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ បានប្តឹងជនសង្ស័យឈ្មោះ កេត សីលា (ពីបទប្រទូសកេរ្តិ៍ខ្មាស់) ដែលប្រព្រឹត្តកាលពីវេលាម៉ោង០៥និង៣០នាទីទាបភ្លឺ ឈានចូលថ្ងៃទី១៨ ខែមីនាឆ្នាំ២០១៧ នៅក្នុងរថយន្តក្រុងក្រុមហ៊ុនថោងស៊ីន ខណះពេលដែលជនរងគ្រោះជិះរថយន្តកៅអីលេខ១Aខាងមុខ ពីភ្នំពេញគោលដៅមកក្រុងសិរីសោភ័ណ។

នៅពេលជិះមកដល់ចំណុចចំណតរថយន្តខេត្តបាត់ដំបង ស្ត្រីម្នាក់ដែលអង្គុយជាមួយបានចុះ ហើយរថយន្តបានបន្តមកខេត្តបន្ទាយមានជ័យ ពេលនោះស្ត្រីរងគ្រោះដេកលង់លក់ ស្រាប់តែជនសង្ស័យឈ្មោះ កេត សីលា បានមកអង្គុយកៅអីក្បែរ ហើយបានលូកលាន់ស្ត្រីរងគ្រោះ បណ្តាលឲ្យភ្ញាក់ហើយស្រែកឆោឡោឡើង ពេលនោះជនសង្ស័យរត់ទៅដេកនៅកៅអីខាងក្រោយ លុះមកដល់ក្រុងសិរីសោភ័ណ ស្រ្តីរងគ្រោះបានទៅប្តឹងកម្លាំងកងអាវុធហត្ថខេត្ត ទើបកម្លាំងកងអាវុធហត្ថខេត្ត ចុះទៅឃាត់ខ្លួនជនសង្ស័យបាននៅថ្ងៃទី១៨ ខែមីនា ឆ្នាំ២០១៧ នៅចំណតរថយន្តក្រុង ក្រុមហ៊ុនថោងស៊ីនតែម្ដង។

លោកវរសេនីយ៍ឯក ស ប៊ុនសឿង បានបន្តទៀតថា ក្រោយពីឃាត់ខ្លួនជនសង្ស័យបាន ហើយនាំយកមកបញ្ជាការដ្ឋានកងរាអាវុធហត្ថខេត្តដើម្បីធ្វើការសាកសួរ ក្រោយពីសាកសួរ ជនសង្ស័យបានឆ្លើយសារភាពថា ខ្លួនគេពិតជាបានប្រព្រឹត្តអំពើនេះពិតប្រាកដមែន។

ជនសង្ស័យត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការបន្តតាមនីតិវិធី។

(អត្ថបទ ឡាក់ ភី)