កំពង់ស្ពឺៈ ជនសង្ស័យចំនួន០២នាក់ ជាមុខសញ្ញាចែកចាយគ្រឿងញៀន ត្រូវបាន កម្លាំងមូលដ្ឋាន កងរាជអាវុធហត្ថក្រុងច្បារមន ធ្វើការឃាត់ខ្លួន។

នេះបើតាមការឱ្យដឹងពី មន្ត្រីកងរាជអាវុធហត្ថក្រុងច្បារមន បានឱ្យដឹងថា ក្នុងការឃាត់ខ្លួនជនសង្ស័យទាំង០២នាក់ខាងលើនេះ គឺធ្វើឡើងជា០២ដំណាក់កាល ដោយប្រតិបត្តិការលើកទី១ គឺធ្វើឡើងនៅវេលាម៉ោង១៨ និង២៥នាទីល្ងាច ថ្ងៃទី០២ ខែមីនា ឆ្នាំ២០១៧ ស្ថិតនៅចំណុច ភូមិក្រាំងពលទេព សង្កាត់រកាធំ ក្រុងច្បារមន ខេត្តកំពង់ស្ពឺ ដោយបានធ្វើការឃាត់ខ្លួនជនសង្ស័យម្នាក់ មានឈ្មោះ ប៉េង ស្រីយាន ភេទស្រី អាយុ២៣ឆ្នាំ នៅភូមិថ្នល់ទទឹង ឃុំដំណាក់អំបិល ស្រុកអង្គស្នួល ខេត្តកណ្តាល និងបានធ្វើការចាប់យកវត្ថុតាងមួយចំនួនរួមមាន ៈ
១. ថ្នាំញៀនប្រភេទម៉ាទឹកកក ចំនួន០១កញ្ចប់
២. ជញ្ជីង ចំនួន០១គ្រឿង
៣. ស្លាកលេខម៉ូតូ ចំនួន០១
៤. ដាវ ចំនួន០១ដើម
៥. កាំបិទ ចំនួន០១
៦. កន្រ្តៃយ៏ ចំនួន០១។

បន្ទាប់ពីធ្វើការឃាត់ខ្លួនរួចមក ជនសង្ស័យត្រូវបានបញ្ចូនទៅមូលដ្ឋាន ដើម្បីបន្តធ្វើការសាកសួរ។
បន្ទាប់ពីធ្វើការសាកសួររួចមក ជនសង្ស័យនោះ បានឆ្លើយសារភាពថា រូបគេនៅមានបក្ខពួកម្នាក់ទៀត ដែលតែងតែយកថ្នាំញៀនមកចែកចាយបន្ត គឺរស់នៅភូមិក្រាំងពលទេព សង្កាត់រកាធំ ក្រុងច្បារមន ខេត្តកំពង់ស្ពឺ។

បន្ទាប់ពីទទួលបានចម្លើយសារភាពរួចមក នៅវេលាម៉ោង២០ និង៣០នាទី ថ្ងៃខែដដែល ដោយមានការសម្របសម្រួលពីព្រះរាជអាជ្ញាអមសាលាដំបូងខេត្ត កម្លាំងកងរាជអាវុធហត្ថ ក៏បានបន្តចុះឆែកឆេរ លំនៅដ្ឋាន របស់បក្ខពួកនោះ និងបានរកឃើញ វត្ថុតាងមួយចំនួនរួមមាន ៈ
១. ថ្នាំញៀនប្រភេទម៉ាទឹកកក ចំនួន០៣កញ្ចប់
២. លុយខ្មែរចំនួន ៦មឺុន និង៥ពាន់រៀល
៣. លុយដុល្លា ចំនួន៤០ដុល្លា និងសម្ភារៈសម្រាប់វេចខ្ចប់គ្រឿងញៀនមួយចំនួន។

ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្ត តាមនីតិវិធី។

(អត្ថបទៈ ម៉ាន់ ដាវីត)