អហ.កណ្តាលស្ទឹង៖ នៅវេលាម៉ោង២២និង០០នាទីថ្ងៃទី១៤ ខែតុលា ឆ្នាំ២០១៥ នៅចំណុចផ្ទះរបស់ឈ្មោះ បូ ដានី ភេទស្រី អាយុ៣២ឆ្នាំ មុខរបរលក់ទូរស័ព្ទដៃ ស្ថិតនៅភូមិកំពង់ទួល ឃុំអន្លង់រមៀត ស្រុកកណ្តាលស្ទឹង ខេត្តកណ្តាល ត្រូវបានជនសង្ស័យមិនស្គាល់អត្តសញ្ញាណធ្វើការគាស់ផ្ទះលួចទូរស័ព្ទដៃ ។
ក្នុងថ្ងៃខែឆ្នាំដដែលដែលមុនកើតហេតុការណ៍វេលាម៉ោង ៧ និង០០នាទី ម្ចាស់ផ្ទះខាងលើបានបិទទ្វារផ្ទះចោលហើយនាំគ្នាទៅដើរលេងនៅខេត្តកែប លុះដល់ថ្ងៃទី១៥ ខែតុលា ឆ្នាំ២០១៥ ម៉ោង៩និង៣៥នាទី ទើបមកដល់ផ្ទះវិញបានចាក់សោរទ្វារផ្ទះខាងមុខ ស្រាប់តែពុំឃើញមានទូរស័ព្ទដែលដាក់លក់ក្នុងទូ ក៏ស្រែកឆោរឡោឡើង និងមើលទ្វារក្រោយឃើញស្នាមរហែកដែកស័ង្កសីពាស់ទ្វារ និងរបូតគន្លឹះខ្ទាស់ទ្វារ ទើបដឹងថាចោរចូលលួច ។
បើតាមសម្តីជនរងគ្រោះបានប្រាប់ដល់សមត្ថកិច្ចជំនាញឲ្យដឹងថាខ្លួនបានបាត់ទូរស័ព្ទ Samsung ចំនួន៥០គ្រឿង ម៉េម៉ូរីមួយចំនួន និងកាត់បញ្ចូលទឹកប្រាក់មួយចំនួន សរុបជាទឹកប្រាក់ប្រហែល ៥០០០ ទៅ៦០០០ដុល្លារអាម៉េរិក ។
ក្រោយហេតុការណ៍នេះសមត្ថកិច្ចជំនាញបានប្រមូលវត្ថុតាងដែលបន្សល់ទុកកន្លែងដោយមានតែកន្ទ្រៃដងលឿងកាត់ក្រណាត់ចំនួន០១ តែប៉ុណ្ណោះ ។
បើទោះបីជាយ៉ាងនេះក្តីកម្លាំងជំនាញមន្ទីរយុត្តិធម៌ខេត្ត និងកម្លាំងកងរាជអាវុធហត្ថស្រុកកណ្តាលស្ទឹង កំពុងស្រាវជ្រាវរកមុខសញ្ញាដើម្បីចាត់ការទៅតាមផ្លូវច្បាប់ ៕
