អហ.ខណ្ឌទួលគោក៖ កម្លាំងកងរាជអាវុធហត្ថខណ្ឌទួលគោក បានឃាត់ខ្លួនជនសង្ស័យ ០១នាក់យោងទៅលើបណ្តឹងរបស់ជនរងគ្រោះ ដែលបានដាក់នៅអង្គភាពមូលដ្ឋានកងរាជអាវុធហត្ថខណ្ឌទួលគោក កាលពីថ្ងៃទី០៧ ខែតុលា ឆ្នាំ២០១៥ ពីបទរំលោភលើទំនុកចិត្ត។
ជនសង្ស័យដែលសមត្ថកិច្ចជំនាញឃាត់ខ្លួនបានមានឈ្មោះ មិន ដារ៉ា ភេទប្រុស អាយុ២៨ឆ្នាំ មុខរបរជាងឡានស្នាក់នៅផ្ទះលេខ៤៥ ផ្លូវ១៣៨ ភូមិ៧ សង្កាត់ទឹកល្អក់១ ខណ្ឌទួលគោក។ ជនសង្ស័យរូបនេះបានខ្ចីម៉ូតូពីជនរងគ្រោះឈ្មោះ ហង្ស សោភ័ណ្ឌ ភេទប្រុស អាយុ៣៦ឆ្នាំ មុខរបរ លក់ដូរ ស្បាក់នៅផ្ទះជួល ភូមិព្រៃទា សង្កាត់ចោមចៅ ខណ្ឌពោធិសែនជ័យ។
ក្រោយពីកងរាជអាវុធខណ្ឌទួលគោកទទួលបានបណ្តឹងពីជនរងគ្រោះដូចសេចក្តីបរិច្ចេទខាងលើ ក៏ធ្វើការឃាត់ខ្លួន និងចាប់ដកវត្ថុតាងមាន ម៉ូតូវីវ៉ា០១គ្រឿង ស៊េរី២០០៤ ពាក់ស្លាកលេខភ្នំពេញ 1U -3739 និងទូរស័ព្ទចំនួន០១គ្រឿង ។
បើតាមសម្តី និងបណ្តឹងរបស់ជនរងគ្រោះបានបញ្ជាក់ថា ហេតុការណ៍នេះបានកើតឡើងកាលពីវេលាម៉ោង១៦និង៣០នាទី ថ្ងៃទី០៣ ខែតុលា ឆ្នាំ២០១៥ ដោយជនសង្ស័យបានទៅខ្ចីម៉ូតូម៉ាកស្មាសវិពណ៌ខ្មៅ ពាក់ស្លាកលេខសៀមរាប 1Q-1857 ពីជនរងគ្រោះដែលកំពុងធ្វើការនៅការ៉ាស់ឡានម្តុំទំនប់ទឹក ខណ្ឌចំការមន ដោយប្រាប់ថាខ្ចីមួយភ្លែតដើម្បីទៅដឹកប្រពន្ធ តែក្រោយមកមិនយកម៉ូតូប្រគល់ឲ្យម្ចាស់ដើមវិញឡើយ ។ រហូតដល់ថ្ងៃទី១៧ ខែតុលា ឆ្នាំ២០១៥ ទើបជនរងគ្រោះជួបជនសង្ស័យនៅការ៉ាស់សាំងកាលតិចផ្លូវម៉ៅសេទុង នៅវេលាម៉ោង១១និង៣០នាទី ក្នុងសង្កាត់ទឹកល្អក៣ ខណ្ឌទួលគោក ទើបរាយការណ៍មកកម្លាំងកងរាជអាវុធខណ្ឌទូលគោកចុះទៅឃាត់ខ្លួនតែម្តង ៕
