កំពតៈ នៅវេលាម៉ោង១៧ និង៣០នាទីល្ងាច ថ្ងៃទី១២ ខែឧសភា ឆ្នាំ២០១៧ កម្លាំងកងរាជអាវុធហត្ថខេត្តកំពត សហការជាមួយ កម្លាំងមូលដ្ឋាន កងរាជអាវុធហត្ថស្រុកអង្គរជ័យ បានធ្វើការឃាត់ខ្លួន ជនសង្ស័យម្នាក់ ជាមេក្លោងក្នុងការចែកចាយគ្រឿងញៀនដ៏សកម្ម ស្ថិតនៅចំណុចភូមិត្រពំាងខ្វា ឃំុភ្នំកុង ស្រុកអង្គជ័យ ខេត្តកំពត។

តាមការបញ្ជាក់ ពីមន្ត្រីកងរាជអាវុធហត្ថខេត្តកំពត បានឱ្យដឹងថា ជនសង្ស័យដែលត្រូវបាន កម្លាំងកងរាជអាវុធហត្ថ ធ្វើការឃាត់ខ្លួននោះមានឈ្មោះ ស៊ុក ហេង ភេទប្រុស អាយុ១៨ឆ្នាំ
រស់នៅភូមិពោធិ៍ ឃំុភ្នំកុង ស្រុកអង្គរជ័យ ខេត្តកំពត ។

មន្ត្រីដដែល បានបញ្ជាក់ឱ្យដឹងទៀតថា ក្នុងការឃាត់ខ្លួនជនសង្ស័យខាងលើនេះផងដែរ កម្លាំងកងរាជអាវុធហត្ថ ក៏បានធ្វើការចាប់យកវត្ថុតាងមួយចំនួនពីជនសង្ស័យរួមមានៈ
១. ថ្នាំញៀនប្រភេទម៉ាទឹកកក ចំនួន០៤កញ្ចប់ ដែលមានទម្ងន់៥១.៧០ក្រាម
២.ទូរស័ព្ទដៃ ចំនួន០១គ្រឿង
៣.ជញ្ជីងសំរាប់ថ្លឹងគ្រឿងញៀន ចំនួន ០១គ្រឿង
៤. ម៉ូតូ ចំនួន០១គ្រឿង។

ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្ត តាមនីតិវិធី។

(អត្ថបទៈ ម៉ាន់ ដាវីត)