អហ.ខណ្ឌទួលគោក៖ ករណីចែកចាយគ្រឿងញៀនពីរទីតាំងផ្សេងគ្នាត្រូវបានកម្លាំងកងរាជអាវុធហត្ថខណ្ឌទួលគោកចុះបង្ក្រាបនៅវេលាម៉ោង ០១និង២០នាទីរំលងអាធ្រាតឈានចូលថ្ងៃទី២២ខែតុលាឆ្នាំ២០១៥ នៅ ផ្លូវ១៩២សង្កាត់ទឹកល្អក់៣ និង ផ្លូវច្រកធ្យូង ផ្លូវ៣៣៦ ភូមិ១០ក្រុម៨ សង្កាត់បឹងសាឡាង ខណ្ឌទួលគោក រាជធានីភ្នំពេញ។
ជនសង្ស័យដែលសមត្ថកិច្ចជំនាញឃាត់ខ្លួនបានមានឈ្មោះ ១-សុខ ហ៊ុយ ភេទប្រុស អាយុ៣០ឆ្នាំ មុខរបរមិនពិតប្រាកដ ស្នាក់នៅផ្ទះជួលក្រោយផ្សារស្ទឹងមានជ័យថ្មី សង្កាត់ស្ទឹងមានជ័យ ខណ្ឌមានជ័យ។
២-ស សុជាតិ ភេទប្រុស អាយុ៣២ឆ្នាំ មុខរបរ រត់ម៉ូតូឌុប ស្នាក់នៅផ្ទះជួលផ្លូវ២៥៣ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ។ ក្នុងនោះសមត្ថកិច្ចបានចាប់ដកវត្ថុតាងមាន ថ្នាំក្រាមសថ្លា ៣កញ្ចប់(ម៉ាទឹកកក)៖ ធំល្មម០២ និង តូច០១ ទូរស័ព្ទដៃ០៣គ្រឿង និង ដបសម្រាប់ជក់១ ។
មុនឈានដល់ការឃាត់ខ្លួនជនសង្ស័យទាំង២នាក់នេះ ដំបូងឡើយកម្លាំងកងរាជអាវុធហត្ថខណ្ឌទួលគោកបានល្បាតក្នុងភូមិសាស្ត្រមកដល់ចំណុចផ្លូវ១៩២ ស្ថិតក្នុងសង្កាត់ទឹកល្អក់៣ បានជួបជនសង្ស័យ០១
នាក់ កម្លាំងកងរាជអាវុធហត្ថបានសុំធ្វើការត្រួតពិនិត្យរកឃើញ ថ្នាំញៀនប្រភេទក្រាមសថ្លា ០១កញ្ចប់តូច ។ រួចទើបបន្តការល្បាតមកដល់ចំណុចផ្លូវច្រកធ្យូង ផ្លូវ៣៣៦ សង្កាត់បឹងសាឡាង ខណ្ឌទួលគោក បានធ្វើការឃាត់ខ្លួនមុខសញ្ញាចែកចាយគ្រឿង០១នាក់ទៀតរួមនឹងវត្ថុតាងក្រាមសថ្លា០២កញ្ចប់ធំល្មមយកមកមូលដ្ឋានខណ្ឌដើម្បីចាត់ការបន្ត៕
