តាកែវ: នៅវេលាម៉ោង០៨ និង០០ នាទីព្រឹក ថ្ងែទី២៤ ខែឧសភា ឆ្នាំ២០១៧ នៅបញ្ជាការដ្ឋាន កងរាជអាវុធហត្ថខេត្តតាកែវ បានប្រារព្ធពិធីប្រជុំត្រួតពិនិត្យ ការអនុវត្តតួនាទីភារកិច្ច និងការងារកងរាជអាវុធហត្ថ ប្រចាំខែឧសភា និងលើកទិសដៅបន្ត ប្រចាំខែមិថុនា ឆ្នាំ២០១៧ និងប្រជំុ ផ្សព្វផ្សាយផែនការ ការពារសន្តិសុខ រក្សាសុវត្ថិភាព ក្នុងកិច្ចដំណើរការបោះឆ្នោតជ្រើសរើសក្រុមប្រឹក្សា ឃុំ សង្កាត់ ដែលនឹងប្រព្រឹត្តទៅនៅថ្ងៃទី០៤ ខែមិថុនា ឆ្នាំ២០១៧ ខាងមុខនេះ
ក្រោមអធិបតីភាព ឯកឧត្តម ឧត្តមសេនីយ៍ត្រី ឡា ឡៃ មេបញ្ជាការ កងរាជអាវុធហត្ថខេត្តតាកែវ និងដោយមានការអញ្ជើញចូលរួមពីសំណាក់ លោកមេបញ្ជាការរង នាយរងសេនាធិការ ប្រធាន អនុប្រធានមន្ទីរ នាយ នាយរងការិយាល័យ មេបញ្ជាការ មេបញ្ជាការរង មូលដ្ឋានក្រុង ស្រុក ស្នាក់ការ និងមេបញ្ជាការ គ ចល័ត នាយ នាយរង កងរាជអាវុធហត្ថខេត្ត សរុបចំនួន៧៥នាក់។
ក្នុងកិច្ចប្រជុំនោះផងដែរ ឯកឧត្តម ឧត្តមសេនីយ៏ត្រី មេបញ្ជាការ ក៏បានជំរុញអោយ មេបញ្ជាការក្រុង ស្រុក ស្នាក់ការ ទាំងអស់ត្រូវយកចិត្តទុកដាក់ ត្រៀមកម្លាំងនៅតាមអង្គភាពរបស់ខ្លួន ជាពិសេសកម្លាំង ដែលត្រូវការពារការិយាល័យ បោះឆ្នោត និងក្រៅពីកម្លាំងមានភារកិច្ចការពារខាងលើ ត្រូវត្រៀមនៅក្នុងអង្គភាព២៤ លើ២៤ម៉ោង រង់ចាំបទបញ្ជាអន្តរាគមន៏ ពេលមានសភាពការណ៏កើតឡើង ដើម្បីធានាការពារអោយបាននូវ សន្ដិសុខ សុវត្តិភាពអោយបាន១០០ភាគរយ។
