ភ្នំពេញ៖ កងរាជអាវុធហត្ថនៃព្រះរាជាណាចក្រកម្ពុជា ត្រូវបានបង្កើតឡើងសាជាថ្មីនៅថ្ងៃទី១៤ ខែកក្កដា ឆ្នាំ១៩៩៣ គិតមកដល់ពេលបច្ចុប្បន្ននេះ កងរាជអាវុធហត្ថមានអាយុ២៤ឆ្នាំហើយ។ ដើម្បីអបអរសាទរខួបអនុស្សាវរីយ៍លើកទី២៤ កងរាជអាវុធហត្ថបានរៀបចំការប្រឡងប្រណាំងនិងប្រកួតកីឡាកងទ័ព ជារៀងរាល់ឆ្នាំ។

ជាក់ស្តែងព្រឹកថ្ងៃទី២៩ ខែឧសភា ឆ្នាំ២០១៧ នៅសាលប្រជុំ សេនាធិការដ្ឋាន នៃទីបញ្ជាការកងរាជអាវុធហត្ថលើផ្ទៃប្រទេស បានបើកកិច្ចប្រជុំផ្សព្វផ្សាយវិញ្ញាសាប្រឡងវប្បធម៌ សិល្បៈ ប្រគុំតន្ត្រី និងប្រកួតកីឡាកងទ័ព អបអរសាទរខួបអនុស្សាវរីយ៍លើកទី២៤ ទិវាកំណើតកងរាជអាវុធហត្ថ ក្រោមអធិបតីភាព ឯកឧត្តម ឧត្តមសេនីយ៍ឯក ភួង ស៊ីភិន មេបញ្ជាការរងកងរាជអាវុធហត្ថលើផ្ទៃប្រទេស និងមានការអញ្ជើញចូលរួមពីសំណាក់ ឯកឧត្តម ឧត្តមសេនីយ៍ លោក វរសេនីយ៍ ចំណុះបញ្ជាការដ្ឋានកងរាជអាវុធហត្ថលើផ្ទៃប្រទេសជាច្រើនរូបផងដែរ។