បាត់ដំបងៈ នៅវេលាម៉ោង១៨ និង៤៥នាទីយប់ ថ្ងៃទី០៥ ខែមិថុនា ឆ្នាំ២០១៧ កម្លាំងកងរាជអាវុធហត្ថខេត្តបាត់់ដំបង សហការជាមួយ កម្លាំងមូលដ្ឋាន កងរាជអាវុធហត្ថក្រុងបាត់ដំបង បានធ្វើការឃាត់ខ្លួនជនសង្ស័យចំនួន០៤នាក់ ស្ថិតនៅចំណុចភូមិ អូរតាគាំ១ សង្កាត់ ទួលតាឯក ក្រុងបាត់ដំបង ខេត្តបាត់ដំបង មានជាប់ពាក់ព័ន្ធជាមួយករណីរក្សាទុក និងចែកចាយនូវសារធាតុញៀន។

តាមការបញ្ជាក់ ពីមន្ត្រីកងរាជអាវុធហត្ថស្រុកបារាយណ៍ បានឱ្យដឹងថា ជនសង្ស័យដែលត្រូវបាន កម្លាំងកងរាជអាវុធហត្ថ ធ្វើការឃាត់ខ្លួននោះរួមមានឈ្មោះៈ
១. ចំរើន ដារ៉ា ភេទប្រុស អាយុ៣១ឆ្នាំ មុខរបរគ្មាន ទីលំនៅភូមិរាំងក្រោល ឃុំរាំងកេសី ស្រុកសង្កែ ខេត្តបាត់ដំបង
២. ពោ សុផាន់ណា ភេទប្រុស អាយុ៣០ឆ្នាំ មុខរបរធ្វើស្រែ ទីលំនៅភូមិ ឱម៉ាល់ សង្កាត់ ឱម៉ាល់ ក្រុង បាត់ដំបង
៣. ប៉ន់ ប៉ែន ភេទប្រុស អាយុ៣០ឆ្នាំ មុខរបរគ្មាន ទីលំនៅភូមិកំពង់ក្របី សង្កាត់ស្វាយប៉ោ ក្រុងបាត់ដំបង ខេត្ដបាត់ដំបង
៤. សុប រ៉ាវី ភេទប្រុស អាយុ៣៦ឆ្នាំ មុខរបរមិនពិតប្រាកដ មានទីលំនៅភូមិនរា២ ឃុំនរាស្រុកសង្កែ ខេត្តបាត់ដំបង។

មន្ត្រីដដែល បានបញ្ជាក់បន្ថែមឱ្យដឹងទៀតថា ក្នុងការឃាត់ខ្លួនជនសង្ស័យខាងលើនេះផងដែរ កម្លាំងកងរាជអាវុធហត្ថ ក៏បានធ្វើការចាប់យកវត្ថុតាងមួយចំនួនពីជនសង្ស័យរួមមានៈ
១. ថ្នាំញៀនប្រភេទម៉ាទឹកកក ចំនួន១៨កញ្ចប់ ដែលមានទម្ងន់ ៨៨.៧៣ក្រាម
២. ថ្នាំងញៀនប្រភេទយ៉ាម៉ាគ្រាប់ ០៦ចំនួន
៣. រថយន្ត ចំនួន០១គ្រឿង
៤. ម៉ូតូ ចំនួន០១គ្រឿង
៥. ទូរស័ព្ទដៃ ចំនួន០៤គ្រឿង។

ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្ត តាមនីតិវិធី។

(អត្ថបទៈ ម៉ាន់ ដាវីត)