បាត់ដំបងៈ នៅវេលាម៉ោង២០ និង២០នាទីយប់ ថ្ងៃទី១២ ខែមិថុនា ឆ្នាំ២០១៧ កម្លាំងមូលដ្ឋាន កងរាជអាវុធហត្ថស្រុកមោងឫស្សី បានធ្វើការឃាត់ខ្លួនជនសង្ស័យចំនួន០២នាក់ ស្ថិតនៅចំណុចភូមិក្បាលថ្នល់ ឃុំកំពង់ព្រៀង ស្រុកសង្កែ ខេត្តបាត់ដំបង មានជាប់ពាក់ព័ន្ធជាមួយ សារធាតុញៀន។

តាមការឱ្យដឹងពីមន្ត្រីកងរាជអាវុធហត្ថស្រុកមោងឫស្សី បានឱ្យដឹងថាជនសង្ស័យដែលត្រូវបាន កម្លាំងកងរាជអាវុធហត្ថ ធ្វើការឃាត់ខ្លួននោះរួមមានឈ្មោះៈ
១. ម៉ាត់ រ៉ស់ហ្វីន ភេទប្រុស អាយុ២០ឆ្នាំ មុខរបរកម្មករ រស់នៅភូមិពោធិ២ ឃុំគារ ស្រុកមោងឫស្សី ខេត្តបាត់ដំបង
២. ឃន ទី ភេទ ប្រុស អាយុ១៩ ឆ្នាំ មុខរបរ ជាងដែក រស់នៅ ភូមិមោង
ឃំុមោង ស្រុកមោងឫស្សី ខេត្តបាត់ដំបង។

មន្ត្រីដដែល បានបញ្ជាក់បន្ថែមឱ្យដឹងទៀតថា ក្នុងការឃាត់ខ្លួនជនសង្ស័យខាងលើនេះផងដែរ កម្លាំងកងរាជអាវុធហត្ថ ក៏បានធ្វើការចាប់យកវត្ថុតាងមួយចំនួនពីជនសង្ស័យរួមមានៈ
១. ថ្នាំញៀនប្រភេទម៉ាទឹកកក ចំនួន០១កញ្ចប់ ដែលមានទម្ងន់ ០.១៧ក្រាម
២. ទូរស័ព្ទដៃ ចំនួន០៣គ្រឿង
៣. មូ៉តូ ចំនួន០១ គ្រឿង។

មន្ត្រីដដែល បានបញ្ជាក់បន្តឱ្យដឹងទៀតថាបានឱ្យដឹងថា ការឃាត់ខ្លួនជនសង្ស័យខាងលើនេះ គឺធ្វើឡើងស្របពេលកម្លាំងមូលដ្ឋាន កងរាជអាវុធហត្ថស្រុកមោងឫស្សី កំពុងបំពេញបេសកកម្មចេញល្បាតការពារសុវត្តិភាពជូនបងប្អូនប្រជាពលរដ្ឋក្នុងបូលដ្ឋាន ស្រាប់តែប្រទះឃើញជនសង្ស័យទាំង០២នាក់ ហាក់មានការសង្ស័យ ក៏បានធ្វើការសួរនាំ និងបានរកឃើញថ្នាំញៀនទាំងនោះ។

ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្ត តាមនីតិវិធី។