តាកែវៈ នៅវេលាម៉ោង១៦ និង៤០នាទីល្ងាច ថ្ងៃទី១២ ខែមិថុនា ឆ្នាំ២០១៧ កម្លាំងកងរាជអាវុធហត្ថខេត្តតាកែវ សហការជាមួយ កម្លាំងមូលដ្ឋាន កងរាជអាវុធហត្ថស្រុកត្រាំកក់ បានធ្វើការឃាត់ខ្លួនជនសង្ស័យចំនួន០៤នាក់ ស្ថិតនៅចំណុចភូមិតាសូង ឃុំពពេល ស្រុកត្រាំកក់ ខេត្តតាកែវ មានជាប់ពាក់ព័ន្ធជាមួយករណីរក្សាទុក និងចែកចាយនូវសារធាតុញៀន។

តាមការឱ្យដឹងពីមន្ត្រីកងរាជអាវុធហត្ថខេត្តតាកែវ បានឱ្យដឹងថាជនសង្ស័យដែលត្រូវបាន កម្លាំងកងរាជអាវុធហត្ថ ធ្វើការឃាត់ខ្លួននោះរួមមានឈ្មោះៈ
១. ហង្ស សីុណា ភេទស្រី អាយុ២៩ឆ្នាំ មុខរបរមេផ្ទះ រស់នៅភូមិតាសូង ឃុំពពេល ស្រុកត្រាំកក់ ខេត្តតាកែវ
២. ចេង ចិនភេទប្រុសអាយុ១៧ឆ្នាំ មុខរបរមិនពិតប្រាកដ រស់នៅភូមិតាម៉ុច ឃុំតាភេម ស្រុកត្រាំកក់ ខេត្តតាកែវ
៣. ខុន រតនៈ ភេទប្រុស អាយុ១៩ឆ្នាំ មុខរបរមិពិតប្រាកដ រស់នៅភូមិមរម្យ ឃុំតាភេម ស្រុកត្រាំកក់ ខេត្តតាកែវ
៤. ឆាយ លីម៉េក ភេទប្រុស អាយុ១៩ឆ្នាំ មុខរបរមិនពិតប្រាកដ រស់នៅភូមិអង្គបក្សី ឃុំជាងទង ស្រុកត្រាំកក់ ខេត្តតាកែវ។

មន្ត្រីដដែល បានបញ្ជាក់បន្ថែមឱ្យដឹងទៀតថា ក្នុងការឃាត់ខ្លួនជនសង្ស័យខាងលើនេះផងដែរ កម្លាំងកងរាជអាវុធហត្ថ ក៏បានធ្វើការចាប់យកវត្ថុតាងមួយចំនួនពីជនសង្ស័យរួមមានៈ
១. ថ្នាំញៀនប្រភេទម៉ាទឹកកក ចំនួន០២កញ្ចប់ធំ ដែលមានទម្ងន់២០,៩០ក្រាម
២. ថ្នាំញៀនប្រភេទវីខេគ្រាប់ ចំនួន៦គ្រាប់
៣. ទូរស័ព្ទដៃ ចំនួន០៣គ្រឿង
៤. មូ៉តូ ចំនួន០២ គ្រឿង និងសម្ភារៈសម្រាប់វេចខ្ចប់គ្រឿងញៀនមួយចំនួន។

ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្ត តាមនីតិវិធី។

(អ.ប ម៉ាន់ ដាវីត)