អហ.បន្ទាយមានជ័យ៖ នៅថ្ងៃទី៣០ ខែតុលា ឆ្នាំ២០១៥ វេលាម៉ោង០៩និង៣០នាទី កម្លាំងកងរាជអាវុធហត្ថក្រុងប៉ោយប៉ែតបានចុះបង្ក្រាបករណីជួញដូរគ្រឿងញៀន នៅចំនុចភូមិមិត្តភាព សង្កាត់ក្រុងប៉ោយប៉ែត ខេត្តបន្ទាយមានជ័យ ដោយឃាត់ខ្លួនជនសង្ស័យចំនួន០២នាក់ ។
ជនសង្ស័យចំនួន០២នាក់ដែលសមត្ថកិច្ចជំនាញឃាត់ខ្លួនបានមានឈ្មោះហុង វិសាល ភេទប្រុស អាយុ២៦ឆ្នាំរស់នៅបន្ទប់ជួលភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
និង ឈ្មោះលាន រ័ត្ន ភេទប្រុស អាយុ៣០ឆ្នាំរស់នៅភូមិប្រជាធម្មកើត សង្កាត់ផ្សាកណ្ដាល ក្រុងប៉ោយប៉ែត ខេត្តបន្ទាយមានជ័យ។ បន្ទាប់ពីធ្វើប្រតិបត្តការហើយភ្លាមកម្លាំងកងរាជអាវុធហត្ថបានធ្វើការឆែកឆេរ បន្ទប់ជួលរបស់ឈ្មោះ ហុង វិសាល បានរកឃើញវត្ថុតាងបន្ថែមទៀតរួមមានគ្រឿងញៀនប្រភេទ ខេទឹកកកចំនួន០៣កូនថង់ថ្លា ជញ្ជីងសម្រាប់ថ្លឹងគ្រឿងញៀនចំនួនមួយគ្រឿងកូនថង់តូចៗពណ៌សថ្លាមួយចំនួន និងឧបករណ៍សំរាប់ប្រើប្រាស់មួយចំនួន៕
