ឧត្តរមានជ័យៈ ជនសង្ស័យម្នាក់ ត្រូវបាន កម្លាំងកងរាជអាវុធហត្ថខេត្តឧត្តរមានជ័យ បានធ្វើការឃាត់ខ្លួន មានជាប់ពាក់ព័ន្ធជាមួយករណីមនុស្សឃាត។

នេះបើតាមការឱ្យដឹងពី មន្ត្រីកងរាជអាវុធហត្ថខេត្តឧត្តរមានជ័យ បានឱ្យដឹងថា ក្នុងការឃាត់ខ្លួនជនសង្ស័យខាងលើនេះ គឺធ្វើឡើងនៅវេលាម៉ោង១៧ និង៣០នាទីល្ងាច ថ្ងៃទី២៨ ខែមិថុនា ឆ្នាំ២០១៧ ស្ថិតនៅចំណុចផ្សាថ្មអូរស្មាច់ ស្ថិតនៅភូមិអូរស្មាច់ សង្កាត់អូរស្មាច់ ក្រុងសំរោងខេត្តឧត្តរមានជ័យ ។

មន្ត្រីដដែល បានបន្តឱ្យដឹងទៀតថា ជនសង្ស័យដែលត្រូវបានកម្លាំងកងរាជអាវុធហត្ថ ធ្វើការឃាត់ខ្លួននោះមានឈ្មោះ ហួត កុង ភេទប្រុស អាយុ៣០ឆ្នាំ មុខរបរបើកបររថយន្ត រស់នៅភូមិធម្មជាតិ ឃុំតាំងក្រសាំង ស្រុកសន្ទុក ខេត្តកំពង់ធំ។

មន្ត្រីដដែល បានបញ្ជាក់ឱ្យដឹងទៀតថា ការឃាត់ខ្លួនជនសង្ស័យខាងលើនេះ គឺធ្វើឡើងទៅតាមដីការបង្គាប់ឲ្យចូលខ្លួនលេខ២៦៩/២០១៧ ចុះថ្ងៃទី២៧ មិថុនា ឆ្នាំ២០១៧ ដោយលោក កើត វណ្ណារ៉េត ព្រះរាជអាជ្ញាអម សាលាដំបូងខេត្តសៀមរាប ជាប់ពាក់ព័ន្ធជាមួយករណីមនុស្សឃាត ប្រព្រឹត្តនៅភូមិដូនហុង ឃុំដុំដែក ស្រុកសូទ្រគម ខេត្តសៀមរាប កាលពីថ្ងៃទី១៦ មិថុនា ឆ្នាំ២០១៧។

ជនសង្ស័យ ត្រូវបានមន្ត្រីជំនាញកងរាជអាវុធហត្ថខេត្តឧត្តរមានជ័យ បានកសាងសំណុំរឿង ប្រគល់ជូនអាវុធហត្ថខេត្តសៀមរាប ដើម្បីចាត់ការបន្ត តាមនីតិវិធី។

(អ.ប ម៉ាន់ ដាវីត)