ស្វាយរៀងៈ នៅវេលាម៉ោង១៨ និង៤០នាទីល្ងាច ថ្ងៃទី២២ ខែកក្កដា ឆ្នាំ២០១៧ កម្លាំងកងរាជអាវុធហត្ថខេត្តស្វាយរៀង សហការជាមួយ កម្លាំងមូលដ្ឋាន កងរាជអាវុធហត្ថក្រុងបាវិត បានធ្វើការឃាត់ខ្លួនជនសង្ស័យចំនួន០៣នាក់ ស្ថិតនៅចំណុចមុខកាសុីណូក្រោន នៅភូមិបាវិតកណ្តាល សង្កាតបាវិត ក្រុងបាវិត ខេត្តស្វាយរៀង។

តាមការឱ្យដឹងពីមន្ត្រីកងរាជអាវុធហត្ថខេត្តស្វាយរៀង បានឱ្យដឹងថា ជនសង្ស័យ ដែលត្រូវបាន កម្លាំងកងរាជអាវុធហត្ថ ធ្វើការឃាត់ខ្លួននោះ រួមមានឈ្មោះៈ
១. ឈឹម មុន្នីរ័ត្ឋ ភេទប្រុស អាយុ២៤ឆ្នាំ ជនជាតិខ្មែរមុខរបរ បុក្គលិកកាសុីណូ មានទីលំនៅភូមិស្តៅកន្លែង ឃុំដីអិដ្ឋ ស្រុកកៀនស្វាយ ខេត្តកណ្តាល
២. ហិន រស្មី ភេទប្រុស អាយុ២៥ឆ្នាំ ជនជាតិខ្មែរ មុខរបរបុក្គលិកកាសុីណូ មានទីលំនៅភូមិច្រកលាវ សង្កាត់បាវិត ក្រុងបាវិត ខេត្តស្វាយរៀង
៣. ង្វៀន ហាយវ៉ាង ភេទប្រុស អាយុ២៥ឆ្នាំ ជនជាតិវៀតណាម មានទីលំនៅភូមិថាញ់ហា ឃុំគយ៉ូវ ស្រុកគយ៉ូវ ខេត្តតៃនិញ ប្រទេសវៀតណាម។

មន្ត្រីដដែល បានបន្តឱ្យដឹងទៀតថា ក្នុងការឃាត់ខ្លួនជនសង្ស័យខាងលើនេះផងដែរ កម្លាំងកងរាជអាវុធហត្ថ ក៏បានធ្វើការចាប់យកវត្ថុតាងពីជនសង្ស័យរួមមានៈ
១. ថ្នាំញៀនប្រភេទម៉ាទឹកកកចំនួន ០១កញ្ចប់ធំ ដែលមានទម្ងន់ ១១.៦៨ក្រាម។
២. ម៉ូតូ ចំនួន០១គ្រឿង
៣. ទូរស័ព្ទ ចំនួន០៣គ្រឿង និងថង់សម្រាប់ច្រកគ្រឿងញៀនមួយចំនួន។

ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្ត តាមនីតិវិធី។