កំពង់ចាមៈ នៅវេលាម៉ោង១៤ និង២០នាទីរសៀល ថ្ងៃទី២៧ ខែកក្កដា ឆ្នាំ២០១៧ កម្លាំងកងរាជអាវុធហត្ថខេត្តកំពង់ចាម សហការជាមួយ កម្លាំងមូលដ្ឋាន កងរាជអាវុធហត្ថស្រុកកងមាស បានធ្វើការឃាត់ខ្លួនជនសង្ស័យចំនួន០៣នាក់ ស្ថិតនៅចំណុចភូមិ ពាមជីកង ឃុំពាមជីកង ស្រុកកងមាស ខេត្តកពង់ចាម។

តាមការឱ្យដឹងពីមន្ត្រីកងរាជអាវុធហត្ថខេត្តកំពង់ចាម បានឱ្យដឹងថា ជនសង្ស័យ ដែលត្រូវបាន កម្លាំងកងរាជអាវុធហត្ថ ធ្វើការឃាត់ខ្លួននោះ រួមមានឈ្មោះៈ
១. ផាត គីមឈែ ភេទប្រុស អាយុ១៧ឆ្នាំ ជនជាតិខ្មែរ មុខរបរសិស្ស រស់នៅភូមិដីថ្មី ឃុំរកាគយ ស្រុកកងមាស ខេត្តកំពង់ចាម
២. ម៉ុង បូរី ភេទប្រុស អាយុ១៧ឆ្នាំ ជនជាតិខ្មែរ រស់នៅភូមិស្វាយតាហែន ឃរុំកាគយ ស្រុកកងមាស ខេត្តកពង់ចាម
៣. ថុល លីហេង ភេទប្រុស អាយុ២៣ឆ្នាំ រស់នៅភូមិពោធិសាលា ឃុំព្រែកក្របៅ ស្រុកកងមាស ខេត្តកំពង់ចាម។

មន្ត្រីដដែល បានបន្តឱ្យដឹងទៀតថា ក្នុងការឃាត់ខ្លួនជនសង្ស័យខាងលើនេះផងដែរ កម្លាំងកងរាជអាវុធហត្ថ ក៏បានធ្វើការចាប់យកវត្ថុតាងពីជនសង្ស័យរួមមានៈ
១. ថ្នាំញៀនប្រភេទម៉ាទឹកកកចំនួន ៤០កញ្ចប់ធំ ដែលមានទម្ងន់ ៣១.៨១ក្រាម។
២. ទូរស័ព្ទ ចំនួន០៦គ្រឿង និងថង់សម្រាប់វិចខ្ចប់គ្រឿងញៀនមួយចំនួន។

ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្ត តាមនីតិវិធី។