តាកែវៈ នៅវេលាម៉ោង១៣ និង៤០នាទីរសៀល ថ្ងៃទី០៣ ខែសីហា ឆ្នាំ២០១៧ កម្លាំងកងរាជអាវុធហត្ថខេត្តតាកែវ សហការជាមួយកម្លាំងកងរាជអាវុធហត្ថខេត្តកំពង់ស្ពឺ និងដោយមានការសម្របសម្រួលពីព្រះរាជអាជ្ញាអមសាលាដំបូងខេត្ត បានធ្វើការឃាត់ខ្លួនជនសង្ស័យចំនួន០២នាក់ ជាមុខសញ្ញាចែកចាយគ្រឿងញៀន ស្ថិតនៅចំណុចឃុំដូង ស្រុកបាទី ខេត្តតាកែវ។

តាមការឱ្យដឹងពីមន្ត្រីកងរាជអាវុធហត្ថខេត្តតាកែវ បានឱ្យដឹងថា ជនសង្ស័យ ដែលត្រូវបាន កម្លាំងកងរាជអាវុធហត្ថ ធ្វើការឃាត់ខ្លួននោះ រួមមានឈ្មោះៈ
១. វ៉ាន់ ភារម្យ ភេទប្រុស អាយុ៣៧ឆ្នាំ មុខរបរ ធ្វើស្រែ រស់នៅឃុំដូង ស្រុកបាទី ខេត្តតាកែវ។
២. កេត ពិស្តា ភេទប្រុស អាយុ២៣ឆ្នាំ មុខរបរមិនពិតប្រាកដ រស់នៅឃុំដូង ស្រុកបាទី ខេត្តតាកែវ។

មន្ត្រីដដែល បានបន្តឱ្យដឹងទៀតថា ក្នុងការឃាត់ខ្លួនជនសង្ស័យខាងលើនេះផងដែរ កម្លាំងកងរាជអាវុធហត្ថ ក៏បានធ្វើការចាប់យកនូវវត្ថុតាងមួយចំនួន ពីជនសង្ស័យរួមមានៈ
១. ថ្នាំញៀនប្រភេទម៉ាទឹកកក ចំនួន១៤កញ្ចប់ ដែលមានទម្ងន់ ៥.៥៤ក្រាម
២. ទូរស័ព្ទ ចំនួន០២គ្រឿង
៣. លុយខ្មែរ ចំនួន២០មឺុន និងសម្ភារៈសម្រាប់វេចខ្ចប់ និងប្រើប្រាសគ្រឿងញៀនមួយចំនួន។

ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្ត តាមនីតិវិធី។