បន្ទាយមានជ័យៈ កម្លាំងជំនាញបទល្មើសគ្រឿងញៀន កងរាជអាវុធហត្ថខេត្តបន្ទាយមានជ័យ សហការជាមួយ កម្លាំងមូលដ្ឋាន កងរាជអាវុធហត្ថស្រុកព្រះនេត្រព្រះ បានចុះធ្វើប្រតិបត្តិការបង្ក្រាបករណីជួញដូរ និងប្រើប្រាស់គ្រឿងញៀនមួយកន្លែង នៅចំណុចភូមិភ្នំជញ្ជាំង ឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ។

មន្ត្រីកងរាជអាវុធហត្ថខេត្តបន្ទាយមានជ័យ បានប្រាប់ឲ្យដឹងថា ករណីខាងលើនេះ កម្លាំងកងរាជអាវុធហត្ថ បានឃាត់ខ្លួន ជនសង្ស័យ បានចំនួន០៥នាក់ និងដកហូតវត្ថុតាងគ្រឿងញៀនប្រភេទមេតំហ្វេតាមីនទឹកកកចំនួន១០កញ្ចប់ និងថង់សម្រាប់វិចខ្ខប់មួយចំនួនធំ ព្រមទាំងប្រាក់ខ្មែរ១៤.០០០រៀល ម៉ូតូចំនួន០១គ្រឿង, ទូរស័ព្ទដៃចំនួន០៣គ្រឿង នៅវេលាម៉ោង០៨និង២៧នាទី ថ្ងៃទី២៥ ឆ្នាំ២០១៧។

មន្ត្រីដដែល បានឲ្យដឹងទៀតថា ជនសង្ស័យទាំង០៥នាក់ ក្រោយពីឃាត់ខ្លួន ត្រូវបានកម្លាំងអាវុធហត្ថបញ្ជូនមក បញ្ជការដ្ឋាន កងរាជអាវុធហត្ថខេត្ត ដើម្បីសាកសួរបន្ត។

មន្ត្រីដដែល បានបញ្ជាក់ឲ្យដឹងទៀតថា ជនសង្ស័យទាំង០៥នាក់នោះ ១/ឈ្មោះ ហល់ ហន ភេទប្រុស អាយុ៣០ឆ្នាំ (ប្រើប្រាស់) ២/ឈ្មោះ ញែម វីរៈ ភេទប្រុស អាយុ២៨ឆ្នាំ (ប្រើប្រាស់) ៣/ឈ្មោះ ហ៊ុន ដាវ៉ាន់ ភេទប្រុស អាយុ២០ឆ្នាំ (ប្រើប្រាស់) ៤/ឈ្មោះ ចាន់ កែវ ភេទប្រុស អាយុ២៤ឆ្នាំ (ប្រើប្រាស់) ៥/ឈ្មោះ លឹម ចិន្ដា ភេទប្រុស អាយុ២៧ឆ្នាំ (ចែកចាយ) ទាំង០៥នាក់ រស់នៅភូមិភ្នំជញ្ជាំង ឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ។

តាមចម្លើយសារភាពរបស់ជនសង្ស័យឈ្មោះ លឹម ចិន្ដា បានឆ្លើយសារភាពថា ខ្លួនគេពិតជាបានទិញគ្រឿងញៀន មកសម្រាប់លក់ចែកចាយ ឲ្យមិត្តភ័ក្រពិតប្រាកដមែន។

ជនសង្ស័យទាំង០៥នាក់ ត្រូវបានមន្ត្រីជំនាញអាវុធហត្ថខេត្តបន្ទាយមានជ័យ បានកសាងសំណុំរឿង បញ្ជូនទៅសាលាដំបូងខេត្ត ដើម្បីចាត់ការតាមនីតិវិធី៕