ព្រះសីហនុៈ នៅវេលាម៉ោង១៣ និង៣០នាទីរសៀល ថ្ងៃទី០៥ ខែធ្នូ ឆ្នាំ២០១៧ កម្លាំងមូលដ្ឋាន កងរាជអាវុធហត្ថស្រុកស្ទឹងហាវ បានធ្វើការបង្ក្រាបករណីរក្សាទុក និងចែកចាយនូវសារធាតុញៀនចំនួន០១លើក ស្ថិតនៅចំណុចក្រុមទី០៤ ភូមិ០៤ ឃុំអូត្រេះ ស្រុកស្ទឹងហាវ ខេត្តព្រះសីហនុ ដោយឃាត់ខ្លួនបានជនសង្ស័យម្នាក់។

នេះបើតាមការឱ្យដឹងពីមន្ត្រីជំនាញ កងរាជអាវុធហត្ថខេត្ត បានឱ្យដឹងថា ជនសង្ស័យដែលត្រូវបានកម្លាំងកងរាជអាវុធហត្ថធ្វើការឃាត់ខ្លួននោះមានឈ្មោះ ខាត់ ចាន់ ភេទប្រុស អាយុ៣៨ឆ្នាំ មុខរបរកម្មករសំណង់ មានស្រុកកំណើត ភូមិស្វាយអញ្ជិប ស្រុកបសេដ្ឋ ខេត្តកំពង់ស្ពឺ។

មន្ត្រីដដែលបានបន្តទៀតថា ក្នុងការឃាត់ខ្លួនជនសង្ស័យខាងលើនេះផងដែរ កម្លាំងកងរាជអាវុធហត្ថ ក៏បានធ្វើការដកហូត នូវវត្ថុតាងមួយចំនួន ពីជនសង្ស័យរួមមានៈ
១. ថ្នាំញៀនប្រភេទសថ្លា ចំនួន៤៩កញ្ចប់
២. ទូរស័ព្ទ ចំនួន០២គ្រឿង
៣. កាបូបលុយ ចំនួន០១
៤. ដបជក់ ចំនួន០១
៥. ដែកកេះ ចំនួន១០
៦. លុយខ្មែរចំនួន ៤២០.៥០០រៀល និងលុយថៃ ចំនួន២០បាត។

ជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថ បានកសាងសំណុំរឿង ដើម្បីចាត់ការបន្ត តាមនីតិវិធី។