រាជធានីភ្នំពេញ៖ នៅវេលាម៉ោង ២០ និង ៣០នាទីថ្ងៃទី១៧ ខែមករា ឆ្នាំ២០១៨ កម្លាំងមូលដ្ឋានកងរាជអាវុធហត្ថខណ្ឌទួលគោក បានឃាត់ខ្លួនជនសង្ស័យចំនួន ០៤នាក់ ពេលកំពុងនាំគ្នាជក់គ្រឿងញៀននៅក្នុងសាលារៀនទឹកល្អក់ ក្នុងសង្កាត់ទឹកល្អក់ទី៣ ខណ្ឌទួលគោក ដោយដកហូតបានថ្នាំញៀនមួយកញ្ចប់ និងសម្ភារៈសម្រាប់សេពគ្រឿងញៀនមួយចំនួន។ ជនសង្ស័យបានសារភាពថា គ្រឿងញៀននោះពួកខ្លួនបាននាំគ្នាទិញពីចំណុចផ្លូវឌឿងហែម ជាប់លូទឹកស្អុយ (ឡធ្យូង) យកមកប្រើប្រាស់បន្ទាប់មកកម្លាំង ក៏បានសហការណ៍ជាមួយការិយាល័យគ្រឿងញៀន កងរាជអាវុធហត្ថរាជធានីភ្នំពេញ ចុះទៅទីតាំងដែលជនសង្ស័យចង្អុលបង្ហាញ និងបានឃាត់ខ្លួនជនសង្សយ័ចំនួន ០២នាក់បន្ថែមទៀត ដោយដកហូតបានថ្នាំញៀនចំនួន ០៦កញ្ចប់ ជនសង្ស័យទាំង០៦ នាក់មាន៖

១.ឈ្មោះ ជា ចិន្តា ភេទប្រុស អាយុ ២២ឆ្នាំ មុខរបរនិស្សិត

២.ឈ្មោះ រស់ ឈុនលេង ភេទប្រុស អាយុ ១៨ឆ្នាំ មុខរបរសិស្ស

៣.ឈ្មោះ លឹម សុគា ភេទប្រុស អាយុ ២៤ឆ្នាំ មុខរបរនិស្សិត

៤.ឈ្មោះ ចាង យាណូ ភេទប្រុស អាយុ២២ ឆ្នាំមុខរបរបុគ្គលិកខារាអូខេ ទាំង ០៤នាក់ ស្នាក់នៅក្នុងសង្កាត់ទឹកល្អក់៣ ខណ្ឌទួលគោក

៥.ឈ្មោះ សេង ពៅ ហៅអាគក ភេទប្រុស អាយុ ៣៤ឆ្នាំ មុខរបរ និងស្នាក់នៅមិនពិតប្រាកដ

៦.ឈ្មោះ សេង ចិត្រា ភេទប្រុស អាយុ ១៤ឆ្នាំ ស្នាក់នៅមិនពិតប្រាកដ។

ជនសង្ស័យ និងវត្ថុតាងត្រូវបានបញ្ជូន ទៅការិយាល័យគ្រឿងញៀនកងរាជអាវុធហត្ថរាជធានីភ្នំពេញ ដើម្បីចាត់ការតាមនីតិវិធី។