ស្វាយរៀង៖ នៅវេលាម៉ោង ០៨ និង ៤៥ នាទី ថ្ងៃទី០៨ ខែកុម្ភៈ ឆ្នាំ២០១៨ មានភ្នាក់ងារបានផ្តល់ព័ត៌មានថាៈ មានរថយន្តម៉ាក LEXUS RX ៣០០ ពាក់ស្លាក់លេខ ភ្នំពេញ ២Q ៤៩១៤ បានដឹកភ្ញៀវជនជាតិចិនម្នាក់ និងវៀតណាមចំនួន ០២នាក់ ពីភ្នំពេញទៅក្រុងបាវិត សង្ស័យថាភ្ញៀវទាំង០៣ នាក់ ជាមុខសញ្ញាជួញដូរគ្រឿងញៀ។ រហូតដល់ម៉ោង ០១ និង០០ នាទីថ្ងៃទី០៩ ខែកុម្ភៈ ឆ្នាំ២០១៨ ក្រោយពីទទួលបានព័ត៌មានភ្លាម ក្រោមបញ្ជាផ្ទាល់ លោកឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀង បានបញ្ជាឱ្យកម្លាំងមន្ទីរយុត្តិធម៌កងរាជអាវុធហត្ថខេត្ត សហការជាមួយ កម្លាំងមូលដ្ឋានកងរាជអាវុធហត្ថស្រុកស្វាយជ្រុំ ដឹកនាំដោយលោកវរសេនីយ៍ឯក ស្រី វុត្ថា មេបញ្ជាការរងកងរាជអាវុធហត្ថខេត្ត បានរៀបចំកម្លាំងចាំស្ទាក់ នៅចំនុចខាងមុខ មូលដ្ឋានកងរាជអាវុធហត្ថស្រុកស្វាយជ្រំ ដើម្បីចាំឃាត់រថយន្ត។ ពេលរថយន្តមកដល់មុខមូលដ្ឋាន កងរាជអាវុធ ហត្ថស្រុកស្វាយជ្រំ កម្លាំងកងរាជអាវុធហត្ថបានប្រើសញ្ញាភ្លើងពិលចរាចរណ៍ជាសញ្ញាឱ្យរថយន្តឈប់ តែរថយន្តមិនព្រមឈប់កម្លាំងកងរាជអាវុធហត្ថ ក៏ដេញតាមមកដល់ចំណុចរង្វង់មូលនាគព័ន្ធ ស្ថិតនៅភូមិស្រះវង្ស សង្កាត់ស្វាយរៀង ក្រុងស្វាយរៀង ខេត្តស្វាយរៀង កម្លាំងសមត្ថកិច្ច ក៏ឃាត់រថយន្តឱ្យឈប់ឃើញមានមនុស្សចំនួន ០២ នាក់ ជាជនជាតិវៀតណាម និងម្នាក់ទៀត ជាអ្នកបើកបរជនជាតិខ្មែរ រួចក៏ធ្វើការឆែកឆេរលើខ្លួនប្រាណពុំមានអ្វីទេ កម្លាំងសមត្ថកិច្ចក៏នាំខ្លួនមក មូលដ្ឋានកងរាជអាវុធហត្ថស្រុកស្វាយជ្រំ ដើម្បីធ្វើការសាកសួរ ។ ពេលមកដល់មូលដ្ឋាន កងរាជអាវុធហត្ថស្រុកស្វាយជ្រំ កម្លាំងសមត្ថកិច្ចក៏ធ្វើការឆែកឆេររថយន្តរកឃើញ ថ្នាំញៀនចំនួន ០៣ កញ្ចប់ធំ ។ ដល់ម៉ោង ០៧ និង ០០ នាទីថ្ងៃទី០៩ ខែកុម្ភៈ ឆ្នាំ២០១៨ កម្លាំងមូលដ្ឋាន កងរាវុធហត្ថស្រុកស្វាយជ្រំបាននាំខ្លួនជនសង្ស័យចំនួន ០២ នាក់ និងម្នាក់ទៀតជាអ្នកបើកបរ មកបញ្ជាការដ្ឋានកងរាជអាវុធហត្ថខេត្តដើម្បីធ្វើការសាកសួរ ។

១.ឈ្មោះ ទ្រិញ វូហ្វឿងតាំ ភេទប្រុស អាយុ ២៥ ឆ្នាំ ជនជាតិវៀតណាម មុខរបរជាងជួសជុលរថយន្ត មានទីលំនៅបច្ចុប្បន្នភូមិថាញ់ទ្រុង ឃុំថាញ់ដៀន ស្រុកចូវថាញ់ ខេត្តតៃនិញ ប្រទេសវៀតណាម ។

២.ឈ្មោះ ង្វៀន ទឹងគៀត ភេទប្រុស អាយុ ១៨ ឆ្នាំ ជនជាតិវៀតណាម មុខរបរ មិនពិតប្រាកដ មានទីលំនៅបច្ចុប្បន្នភូមិថាញ់ទ្រុង ឃុំថាញ់ដៀន ស្រុកចូវថាញ់ ខេត្តតៃនិញ ប្រទេសវៀតណាម

៣.ឈ្មោះ ភិន វណ្ណឌី ភេទប្រុស អាយុ ១៩ ឆ្នាំ ជនជាតិខ្មែរ មុខរបររត់តាក់ស៊ីមាន ទីលំនៅ បច្ចុប្បន្នភូមិដំបូកជួរ សង្កាត់ច្រកម្ទេស ក្រុងបាវិត ខេត្តស្វាយរៀង នាំមកបញ្ជាការដ្ឋាកងរាជអាវុធហត្ថខេត្តដើម្បីធ្វើការសាកសួរ។

វត្ថុតាងចាប់យករួមមាន៖

១.ម្សៅក្រាមពណ៌សថ្លាចំនួន០៣ កញ្ចប់ធំ ទម្ងន់ ៣០៦ ក្រាម គិតទាំងសំបកវេចខ្ចប់

២.ប្រាក់ដុងចំនួន ៨១៥.០០០ ដុង

៣.ប្រាក់ដុល្លាចំនួន ០៨ ដុល្លារអាមេរិច

៤.ទូរស័ព្ទចំនួន ០២ គ្រឿង

៥.អត្តសញ្ញាណប័ណ្ណចំនួន ០២ សន្លឹក

បច្ចុប្បន្នជនសង្ស័យជនជាតិវៀតណាមចំនួន ០២នាក់ និងវត្ថុតាងបញ្ជូនទៅតុលាការ ចំណែកអ្នកបើកបររថយន្តដោយពុំមានការពាក់ព័ន្ធ កម្លាំងបានធ្វើការអប់រំនិងបានដោះលែងឱ្យទៅលំនៅដ្ឋានវិញ។