រាជធានីភ្នំពេញៈ កងអន្តរាគមន៍ កងរាជអាវុធហត្ថ ប្រកាសគាំទ្រញត្តិរបស់លោក នាយឧត្តមសេនីយ៍ មេបញ្ជាការ កងរាជអាវុធហត្ថលើផ្ទៃប្រទេស ដែលថ្កោលទោសដាច់អហង្ការចំពោះទង្វើថោកទាប ក្បត់ជាតិ ក្បត់ប្រជាជនរបស់ទណ្ឌិត សម រង្ស៊ី និងគាំទ្រទាំងស្រុងចំណាត់ការរបស់រាជរដ្ឋាភិបាលលើជនក្បត់ជាតិរូបនេះ

នៅថ្ងៃសុក្រ ១៥រោច ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី១៦ ខែមីនា ឆ្នាំ២០១៨ លោកវរសេនីយ៍ឯក ខឹម ពេជ្រ មេបញ្ជាការ កងអន្តរាគមន៍ កងរាជអាវុធហត្ថ ព្រមទាំងនាយទាហាន នាយទាហានរង ទាំងអស់ បានប្រកាសគាំទ្រញត្តិរបស់លោក នាយឧត្តមសេនីយ៍ មេបញ្ជាការកងរាជអាវុធហត្ថលើផ្ទៃប្រទេសដែលមានខ្លឹមសារដូចខាងក្រោម៖
-កងរាជអាវុធហត្ថ ធ្វើការថ្កោលទោសដាច់អហង្ការចំពោះទង្វើថោកទាប ក្បត់ជាតិ ក្បត់ប្រជាជន របស់ទណ្ឌិត សម រង្ស៊ី ក្នុងការចុះហត្ថលេខាលើកិច្ចព្រមព្រៀងកាត់ទឹកដីខ្មែរចំនួន ៤ខេត្ត ឱ្យទៅបរទេស។
-កងរាជអាវុធហត្ថ គាំទ្រទាំងស្រុង ចំណាត់ការផ្នែកនីតិវិធីរបស់រាជរដ្ឋាភិបាលទៅលើជនក្បត់ជាតិរបស់ទណ្ឌិត សម រង្ស៊ី។
-កងរាជអាវុធហត្ថ ត្រៀមខ្លួនធ្វើពលិកម្មដោយទឹកចិត្តអង់អាចក្លាហាន ដើម្បីការពាររដ្ឋធម្មនុញ្ញ ការពារទឹកដី ប្រជាជន និងសន្តិភាព ក្រោមការដឹកនាំរបស់រាជរដ្ឋាភិបាលស្របច្បាប់ ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ។