អហ.បន្ទាយមានជ័យ៖ នៅវេលាម៉ោង៩យប់ថ្ងៃទី៣ ខែកុម្ភះ ឆ្នាំ២០១៦ នេះកំលាំងមូលដ្ឋានកងរាជអាវុធហត្ថក្រុងប៉ោយប៉ែតដឹកនាំដោយ លោកវរ:សេនីយ៍ត្រី ជា ដាមេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានចុះល្បាតក្នុងភូមិសាស្ត្រ ក្នុងភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ហើយបានដាក់ប៉ុស្តិ៍ត្រួតពិនិត្យបានធ្វើការឆែកឆេរអាវុធជាតិផ្ទុះស្រាប់តែមានម៉ូតូមកដល់កំលាំងអាវុធហត្ថធ្វើការត្រួតពិនិត្យឆែកឆេរលើខ្លួនប្រាណជនសង្ស័យម្នាក់បានរកឃើញវត្ថុតាងថ្នាំញៀនម៉ាទឹកកក មានចំនួន២ថង់តូចនិងថង់សំរាប់វេចខ្ចប់មួយចំនួន ជនសង្ស័យនោះត្រូវបានអាវុធហត្ថបញ្ជូនមកទីបញ្ជាការដ្ឋានខេត្តដើម្បីធ្វើការសាកសួរ។ លោកវរ:សេនីយ៍ឯក ស ប៊ុនសឿង មេបញ្ជាការ រងកងរាជអាវុធហត្ថខេត្តបន្ទាយមានជ័យ ទទួលលើការងារគ្រឿងញៀនបានឲ្យដឹងថា ជនសង្ស័យមានឈ្មោះ គុយ សុងហុង ភេទប្រុស អាយុ៣២ឆ្នាំ រស់នៅមិនពិតប្រាកដ។ លោកវរ:សេនីយ៍ឯក ស ប៊ុនសឿង បានបញ្ជាក់ទៀតថា បើតាមចម្លើយសារភាពរបស់ជនសង្ស័យ បានឆ្លើយសារភាពថា ខ្លួនពិតជាបានទិញគ្រឿងញៀននេះពីបុរស់ម្នាក់មិនស្គាល់ឈ្មោះយកមកទុកជក់ផងនិងធ្វើការចែកចាយបន្តផង តែនៅយប់នោះចៃដនអាក្រក់ត្រូវកងរាជអាវុធហត្ថក្រុងប៉ោយប៉ែតធ្វើការឃាត់ខ្លួនបានតែម្តង។លោកវរ:សេនីយ៍ឯក ស ប៊ុនសឿង បានបញ្ជាក់ទៀតថា ដោយបានចំលើយសារភាពពីជនសង្ស័យនិងមានភស្តុតាងទៀតនោះជនសង្ស័យត្រូវបានអាវុធហត្ថខេត្តកសាងសំណុំរឿងបញ្ជូនទៅតុលាកាដើម្បីដាក់ទោសទៅតាមផ្លូវច្បាប់៕