អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស បានអនុញ្ញាតឱ្យលោកវរសេនីយ៍ឯក សារ៉ាយុទ្ធ ប៊ុនជឿ សេនានុព័ន្ធយោធានៃព្រះរាជាណាច្រក្រថៃប្រចាំនៅព្រះរាជាណាចក្រកម្ពុជា និងប្រតិភូអមដំណើរ ចូលជួបសម្តែងការគូរសម នឹងជូនពរឆ្នាំថ្មី ឆ្នាំច សំរឹទ្ធិស័ក ព.ស.២៥៦២ ដែលនិងមកដល់ក្នុងពេលឆាប់ៗខាងមុខនេះ។

លោក សារ៉ាយុទ្ធ ប៊ុនជឿ បានថ្លែងនូវអំណរគុណយ៉ាងជ្រាលជ្រៅចំពោះ លោកនាយឧត្តមសេនីយ៍ សៅ សុខា ដែលបានអនុញ្ញាតឱ្យរូបលោក និងប្រតិភូបានជួបសម្តែងការគួរសមនិងជូនពរឆ្នាំថ្មីឆ្នាំច សំរឹទ្ធិស័ក ព.ស.២៥៦២ លោកវរសេនីយ៍ឯក បានបន្តថាក្នុងរយៈពេលលោកបំពេញបេសកកម្មនៅប្រទេសកម្ពុជា កម្លាំងកងយោធពលខេមរភូមិន្ទមានកិច្ចសហប្រតិបត្តិការល្អជាមួយគ្នា ក៏ដូចជាកម្លាំងកងរាជអាវុធហត្ថផងដែរ ។ លោកវរសេនីយ៍ បានជូនពរដល់លោកនាយឧត្តមសេនីយ៍ សៅ សុខា និងក្រុមគ្រួសារ ព្រមទាំងនាយទាហាន នាយទាហានរងនៅកងរាជអាវុធហត្ថទាំងអស់ សូមឱ្យមានសុខភាពល្អ មានសុភមង្គល សម្រេចការងារបានជោគជ័យ ក្នុងការថែរក្សាសន្តិសុខ សណ្តាប់ធ្នាប់ជូនប្រជាពលរដ្ឋ និងសង្គមជាតិ និងសម្រេចបានជោគជ័យយ៉ាងត្រចះត្រចង់ដែលរាជរដ្ឋាភិបាលប្រគល់ជូន។

លោកនាយឧត្តមសេនីយ៍ សៅ សុខា បានស្វាគមន៍ និងសាទរចំពោះសេនានុព័ន្ធយោធាថៃ ដែលជាស្ពានដ៏រឹងមាំ នៃចំណងសាមគ្គីភាព មិត្តភាព កិច្ចសហប្រតិបត្តិការ រវាងប្រទេសទាំងពីរ កងទ័ពទាំងពីរកម្ពុជា-ថៃ ហើយប្រទេសយើងទាំងពីរ ប្រជាជនទាំងពីរ គឺមានវប្បធម៌ និងប្រពៃណីប្រហាក់ប្រហែលគ្នា ។ លោកនាយឧត្តមសេនីយ៍ ក៏បានថ្លែងអំណរគុណ នឹងជូនពរលោកវរសេនីយ៍ឯក និងប្រតិភូ សូមឱ្យជោគជ័យក្នុងភារកិច្ចដែលរដ្ឋាភិបាលប្រគល់ជូន និងជូបប្រទះតែសុខភាពល្អ កំលាំងមាំមួន មានសុភមង្គលក្នុងក្រុមគ្រួសារ និងពុទ្ធពរទាំងបួនប្រការគឺអាយុ វណ្ណៈ សុខៈ ពលៈ កុំបីឃ្លាងឃ្លាតឡើយ។