ស្វាយរៀង៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្ដី រដ្ឋមន្រ្ដីក្រសួង ទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានអញ្ជើញជាអធិបតី ក្នុងពិធីសម្ពោធអគារសិក្សា សាលាបឋមសិក្សា ហ៊ុន សែន មុខដា ស្ថិតនៅភូមិ ក្រញូង ឃុំមុខដា ស្រុករមាសហែក ខេត្ដស្វាយរៀង នាព្រឹកថ្ងៃពុធ ១១រោច ខែបឋមមាសាឍ ឆ្នាំច សំរឹទ្ធិស័ក ព.ស២៥៦២ ថ្ងៃទី២៣ ខែមិថុនា ឆ្នាំ២០១៨។
ថ្លែងក្នុងឱកាសនោះ លោកជំទាវកិត្តិសង្គបណ្ឌិត បានពាំនាំការផ្តាំផ្ញើសាកសួរសុខទុក្ខពី សំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនដល់អង្គពិធីទាំងមូលផងដែរ។ លោកជំទាវក៏បាន ថ្លែងអំណរគុណដល់ឯកឧត្តម សៅ សុខា អគ្គមេបញ្ជាការង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ដែលបានចំណាយថវិកាផ្ទាល់ខ្លួន ហើយក៏មានការចូលរួមពីសំណាក់ ឯកឧត្តម លោកជំទាវ លោកឧកញ៉ា លោក លោកស្រី និងសប្បុរសជនជិតឆ្ងាយ ទាំងអស់បានរួមគ្នាក្នុង ការកសាងអគារសិក្សាសាលាបឋមសិក្សា ហ៊ុន សែន មុខដា ១ខ្នង ដែលមាន ៥បន្ទប់ ចំណាយថវិកាអស់ ៥៦.២៧៥ដុល្លារ សហរដ្ឋអាមេរិក ដែលបានចូលរួមចំណែកក្នុងការអភិវឌ្ឍន៍វិស័យអប់រំនៅក្នុងខេត្តស្វាយរៀង ផងដែរ។
លោកជំទាវក៏បានអំពាវនាវឲ្យ ៖
១. មាតា បិតា អាណាព្យាបាលកុមារ ដែលគ្រប់អាយុចូលសាលា ត្រូវនាំកូនទៅចុះ ឈ្មោះចូលរៀនឲ្យបានគ្រប់ៗគ្នា ។
២. អាជ្ញាធរគ្រប់លំដាប់ថ្នាក់ខិតខំថែមទៀតក្នុងការការពារសន្ដិសុខសណ្ដាប់ធ្នាប់សង្គម របៀបរៀបរយសាធារណៈ ភូមិ-ឃុំ មានសុវត្ថិភាព និងត្រូវតែប្រព្រឹត្តអំពើល្អ បម្រើសេវាសាធារណៈឱ្យបានល្អប្រសើរ ជូនប្រជាពលរដ្ឋនៅមូលដ្ឋាន។
៣.ត្រូវរួមគ្នាជ្រោងទង់សុខសន្តិភាព និងការអភិវឌ្ឍ និងរួមគ្នាថែរក្សា នូវសមិទ្ធផល នានារបស់រាជរដ្ឋាភិបាល។
៤. នៅថ្ងៃអាទិត្យ ទី២៩ ខែកក្កដា ឆ្នាំ២០១៨ ខាងមុខនេះ ត្រូវទៅបោះឆ្នោតឱ្យបានគ្រប់ៗ គ្នាកុំបីខាន។
