កំពង់ចាម៖ ព្រឹកថ្ងៃសុក្រ ៨កើត ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២០ ខែកក្កដា ឆ្នាំ២០១៨ លោកឧត្តមសេនីយ៍ សោ សាវឿន មេបញ្ជាការកងរាជអាវុធខេត្តកំពង់ចាម បាននាំយកអំណោយរបស់ លោកនាយឧត្តមសេនីយ៍ សៅ សុខា អគ្គមេបញ្ជាការស្តីទី នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងលោកជំទាវ ទៅប្រគល់ជូនដល់គ្រួសារដែលជួបការលំបាកចំនួនមួយគ្រួសារឈ្មោះ វ៉ាន់ គឿន ត្រូវជាប្តី អាយុ ៣៧ឆ្នាំ ប្រពន្ធឈ្មោះ រ៉េន ចន្ថា អាយុ ៣៦ឆ្នាំដែលមានកូនតូចៗចំនួន ០៥នាក់ក្នុងបន្ទុក ហើយកូនម្នាក់បានរងរបួសបាក់ជើងដោយសារគ្រោះថ្នាក់ចរាចរណ៍ ដែលសព្វថ្ងៃរស់នៅភូមិមេសរ ឃុំព្រែកកុយ ស្រុកកងមាស ខេត្តកំពង់ចាម អំណោយរួមមានអង្ករ៥បាវ, មី ៤កេសតូច, ទឹកដោះគោ១០កំប៉ុង, ស្កសរ១០គីឡូក្រាម, ទឹកត្រី០២យួរ, ទឹកស៊ីអ៊ីវ០២យួរ, ទឹកបរិសុទ្ធ ០៥យួរ, ថវិកាចំនួន ១.០០០.០០០៛ និងជូនថវិកាចាស់ជរា ០២នាក់អស់១៤០.០០០រៀលផងដែរ។
លោកឧត្តមសេនីយ៍ត្រី សោ សាវឿន បានពាំនាំនូវការផ្តាំផ្ញើសាកសួរសុខទុក្ខ ពីសំណាក់លោកនាយឧត្តមសេនីយ៍ សៅ សុខា និងលោកជំទាវ និងជូនពរឱ្យលោក វ៉ាន់ គឿន រួមទាំងក្រុមគ្រួសារមានសុខភាពល្អ បង្ហាត់បង្រៀនកូនឱ្យក្លាយជាមនុស្សល្អ កូនល្អ និងត្រូវឱ្យកូនៗបានចូលសិក្សារៀនសូត្រឱ្យបានគ្រប់ៗគ្នារហូតចប់ចុងចប់ដើម ជាពិសេសត្រូវចូលរួមបោះឆ្នោតឱ្យបានគ្រប់គ្នាដែលនឹងប្រព្រឹត្តទៅនាថ្ងៃអាទិត្យ ទី២៩ ខែកក្កដា ឆ្នាំ២០១៨ ខាងមុខនេះ ។ លោកស្រីរ៉េន ចន្ថា បានថ្លែងនូវអំណរគុណយ៉ាងជ្រាលជ្រៅ និងត្រេកអរជាអនេកដែលបានទទួលអំណោយទាំងអស់នេះ នឹងសូមជូនពរលោកនាយឧត្តមសេនីយ៍ សៅ សុខា និងលោកជំទាវ រួមទាំងមន្ត្រីក្រោមឱវាទទាំងអស់សូមមានសុខភាពល្អរិបូណ៌ កម្លាំងពលំមាំមួន អាយុយឺនយួរ ឈ្នះអស់មាសត្រូវ និងជោគជ័យនូវគ្រប់ភារកិច្ចការងារ ជាពិសេសសូមជួបប្រទះតែពុទ្ធពរទាំងប្រាំប្រការគឺអាយុ វណ្ណៈ សុខៈ ពលៈ និងបដិភាណៈ កុំបីឃ្លៀងឃ្លាតឡើយ។