តាកែវ៖ នៅវេលាម៉ោង ១៨ និង ៣០នាទី ថ្ងៃទី១៩ ខែកក្កដា ឆ្នាំ២០១៨ កម្លាំងការិយាល័យប្រឆាំងបទល្មើសគ្រឿងញៀនកងរាជអាវុធហត្ថខេត្តតាកែវ ដឹកនាំដោយលោកវរសេនីយ៍ឯក ង៉ែត ចាន់ធី មេបញ្ជាការរង ទទួលផែនយុត្តិធម៌ និងដោយមានការសម្របសម្រួលនីតិវិធីពីលោក ជីវ ចាន់តារា ព្រះរាជអាជ្ញា អមសាលាដំបូងខេត្ត បានចុះឮបង្ក្រាបមុខសញ្ញាជួញដូរ និងដឹកជញ្ជូនញៀនសារធាតុញៀនដោយខុសច្បាប់ នៅចំនុចផ្សារតាកោ សង្កាត់រកាក្នុង ក្រុង/ខេត្តតាកែវ ដោយឃាត់ខ្លួនជនសង្ស័យម្នាក់ ឈ្មោះ កែ ចាន់លុច ភេទប្រុស អាយុ ២១ឆ្នាំ បច្ចុប្បន្នរស់់នៅម្តុំវត្តសន្សំកុសល ក្រុងភ្នំពេញ រួមទាំងដកហូតបានវត្ថុតាង ម្សៅក្រាមសថ្លាចំនួន ២កញ្ចប់ ទម្ងន់ ៥២,៤៧ក្រាម ទូរស័ព្ទចំនួន ១គ្រឿង និងសម្ភារៈសំរាប់សេពថ្នាំញៀនមួយចំនួន។

បច្ចុប្បន្នជនសង្ស័យ និងវត្ថុតាង ត្រូវបានការិយាល័យជំនាញកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធី។