បន្ទាយមានជ័យ៖ នៅវេលាម៉ោង០៨ និង ០០នាទីថ្ងៃទី០៦ ខែសីហា ឆ្នាំ២០១៨ នៅចំណុចភូមិទួលពង្រ ឃុំទួលពង្រ ស្រុកម៉ាឡៃ កម្លាំងមូលដ្ឋានកងរាជអាវុធហត្ថស្រុកម៉ាឡៃ ដឹកនាំដោយលោកវរសេនីយ៍ត្រី តាំង សុខហេង មេបញ្ជាការមូលដ្ឋានកងរាជអាវុធហត្ថស្រុក បានចុះប្រតិបត្តិការបង្រ្កាបករណីជួញដូរ និងប្រើប្រាស់សារធាតុញៀនដោយខុសច្បាប់ និងឃាត់ខ្លួនជនសង្ស័យបានចំនួន ០២នាក់។

លោកវរសេនីយ៍ត្រី តាំង សុខហេង បានឱ្យដឹងថា ៖ ក្រោយពីបានទទួលព័ត៌មានពីករណីជួញដូរគ្រឿងញៀន នៅចំណុចកើតហេតុខាងលើ និងដោយអនុវត្តតាមការអនុលោមរបស់លោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត លោកបានដឹកនាំកម្លាំងចុះបង្រ្កាបភ្លាមៗនៅនឹងកន្លែង និងឃាត់ខ្លួនជនសង្ស័យបានចំនួន ០២នាក់ឈ្មោះ ខែន វាសនា ភេទប្រុស អាយុ ៤៥ឆ្នាំ ជនជាតិខ្មែរ បច្ចុប្បន្នស្នាក់នៅភូមិប្រជាធម្មកើត សង្កាត់ផ្សារកណ្តាល ក្រុងប៉ោយប៉ែត និងឈ្មោះ សោម វាសនា ភេទប្រុស អាយុ ២៥ឆ្នាំ ជនជាតិខ្មែរ បច្ចុប្បន្នស្នាក់នៅភូមិទួលពង្រ ឃុំទួលពង្រ ស្រុកម៉ាឡៃ រួមទាំងដកហូតបានវត្ថុតាងមាន៖ គ្រឿងញៀនមេតំហ្វេតាមីន(ម៉ាទឹកកក)ចំនួន ០៥កូនថង់ ទម្ងន់៣.៣៨ក្រាម, ម្សៅក្រាមពណ៌ស(សាជូ)ទម្ងន់ ៤៩៦ក្រាម, ទូរស័ព្ទចំនួន ០២គ្រឿង, កាំបិតខ្វែវ ០២ដើម, កាំបិតសាំម៉ូរ៉ៃ ០២ដើម, ចំពុះទុង ០១ដើម, ម៉ាស៊ីនកំដៅហ្សីហ្សា ០១គ្រឿង, អាយកូមពណ៌ខ្មៅចំនួន ០២គ្រឿង និងកូនថង់់សម្រាប់ច្រកគ្រឿងញៀនមួយ។

បន្ទាប់ពីសាកសួរ និងផ្អែកលើចម្លើយសារភាពរបស់ជនសង្ស័យខាងលើរួចមក ជនសង្ស័យ និងវត្ថុតាង ត្រូវបានកម្លាំងជំនាញ កសាងសំណុំរឿងបញ្ជូនទៅតុលាការ ដើម្បីចាត់ការទៅតាមនីតិវិធី ។