កំពង់ស្ពឺ៖ ដោយអនុវត្តនូវបទបញ្ជាយ៉ាងតឹងរ៉ឹង ក្នុងការ ការពារសន្តិសុខ សណ្តាប់ធ្នាប់ ដែលដឹកនាំដោយ លោកឧត្តមសេនីយ៍ត្រី ជូ សារុន មេបញ្ជាការកងរាជអាវុធហត្ថខេត្ត បានដាក់បទបញ្ជាឲ្យក្រុង/ស្រុក ស្នាក់ការសន្តិសុខទាំងអស់ សហការគ្នាបង្ក្រាប បទល្មើសផ្សេងៗ ដោយម៉ឺងម៉ាត់ ដើម្បីការពារសន្តិសុខ សណ្តាប់ធ្នាប់ក្នុងមូលដ្ឋានរបស់ខ្លួន និងផលប្រយាជន៍ពលរដ្ឋ ជាក់ស្តែងនៅថ្ងៃទី ១០ ខែសីហា ឆ្នាំ២០១៨ នៅចំណុចភូមិក្រាំងពលទេព សង្កាត់រកាធំ ក្រុង/ខេត្តកំពង់ស្ពឺ កម្លាំងមូលដ្ឋានកងរាជអាវុធហត្ថក្រុងច្បារមន ដឹកនាំដោយលោកវរសេនីយ៍ត្រី ធី ឆៃ មេបញ្ជាការមូលដ្ឋានកងរាជអាវុធហត្ថក្រុងច្បារមន បានចុះបង្ក្រាបករណីចែកចាយគ្រឿងញៀន ដោយឃាត់ខ្លួនជនសង្ស័យម្នាក់ឈ្មោះ ប៉ិន រស្មី ភេទប្រុស អាយុ ២៥ឆ្នាំ មុខរបរមិនពិតប្រាកដ មានទីលំនៅភូមិ សង្កាត់ខាងលើ រួមទាំងដកហូតបានវត្ថុតាងម្សៅក្រាមពណ៌សថ្លាចំនួន ០១កញ្ចប់ ទំងន់ ០.៣៥ក្រាម, ទូរស័ព្ទ ០១គ្រឿង, ជញ្ជីងថ្លឹងថ្នាំញៀន ០១, ថង់ច្រកថ្នាំ ០១ដុំ និងប្រាក់រៀលចំនួន ២០,០០០ រៀល។

បច្ចុប្បន្នជនសង្ស័យ និងវត្ថុតាង ត្រូវបានបានបញ្ជូនមកបញ្ជាការដ្ឋានកងរាជអាវុធហត្ថខេត្តកំពង់ស្ពឺ ដើម្បីចាត់ការបន្ត។