ពោធិ៍សាត់៖ នៅវេលាម៉ោង ២២ និង ៣០នាទី ថ្ងៃទី២៥ ខែសីហា ឆ្នាំ២០១៨ កម្លាំងមូលដ្ឋានកងរាជអាវុធហត្ថស្រុកភ្នំក្រវាញ សហការជាមួយកម្លាំងកងរាជអាវុធហត្ថលើផ្ទៃប្រទេស ដឹកនាំដោយលោកវរសេនីយ៍ឯក អ៊ូ សុផារ៉ា ប្រធានក្រុមបង្ក្រាបបទល្មើសធនធានធម្មជាតិ កងរាជអាវុធហត្ថលើផ្ទៃប្រទេស បានចុះបង្ក្រាបបទល្មើសការដឹកជញ្ជូនអនុផលព្រៃឈើនៅលើផ្លូវលេខ ៥៥ ចំណុចភូមិ ព្រែក១ ឃុំសំរោង ស្រុកភ្នំក្រវាញ ដោយឃាត់បានរថយន្ត ០១គ្រឿង ម៉ាកដេវ៉ូ ពណ៌ក្រហម ពាក់ស្លាកលេខព្រៃវែង ៣A ០៧៩៣ និងរ៉ឺម៉កពាក់ស្លាកលេខ ភ្នំពេញ ៤A ១៩២៦ ដឹកអុសស្រស់ចំនួន ៥០ស្ទែរ រួមទាំងឃាត់ខ្លួនជនសង្ស័យចំនួន ០២នាក់មានឈ្មោះ មាគ វិត ភេទប្រុស អាយុ ២៧ឆ្នាំ (ជាអ្នកបើកបររថយន្ត) រស់នៅភូមិបឹងឈើទង ឃុំអូរសារ៉ាយ ស្រុកត្រាំកក់ ខេត្ត តាកែវ និងឈ្មោះ ឈីន ចិត្ត ភេទប្រុស អាយុ ៣១ឆ្នាំ (ព្រូរថយន្ត) រស់នៅភូមិជ្រៃផ្សារ ឃុំជ្រៃ ខេត្តព្រៃវែង។
បច្ចុប្បន្នជនសង្ស័យ និងវត្ថុតាងត្រូវបានប្រគល់ឲ្យផ្នែករដ្ឋបាលព្រៃឈើ ស្រុកភ្នំក្រវាញ ដើម្បីចាត់ការតាមនីតិវិធី។