បន្ទាយមានជ័យ៖ នៅវេលាម៉ោង ០១ និង ០០នាទី ថ្ងៃទី២៧ ខែកញ្ញា ឆ្នាំ២០១៨ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង បានចុះប្រតិបត្តិការបង្រ្កាបករណីរក្សាទុក និងប្រើប្រាស់សារធាតុញៀន ដោយឃាត់ខ្លួនជនសង្ស័យបានចំនួន ០៣នាក់ នៅចំណុចផ្លូវកែវអេផ្លាស់ ស្ថិតនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត។
ជនសង្ស័យទាំង ០៣នាក់មាន៖ ១. ឈ្មោះ ថា សុវណ្ណា ភេទប្រុស អាយុ ២៧ឆ្នាំ ជនជាតិខ្មែរ មុខរបរកម្មករ បច្ចុប្បន្នរស់នៅភូមិសាមគី្គមានជ័យ សង្កាត់ប៉ោយប៉ែត ក្រុងប៉ោយប៉ែត រួមទាំងដកហូតបានថ្នាំញៀនមេតំហ្វេតាមីនទឹកកកចំនួន ០១កូនថង់ ទម្ងន់ ០.៥៣ក្រាម, ២. ឈ្មោះ មាស ដែត ភេទប្រុស អាយុ ៣៥ឆ្នាំ ជនជាតិខ្មែរ មុខរបរមិនពិតប្រាកដ បច្ចុប្បន្នរស់នៅភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត រួមទាំងដកហូតបានថ្នាំញៀនមេតំហ្វេតាមីនទឹកកកចំនួន ០១កូនថង់ ស្មើ ០.៨៣ក្រាម និងមេតំហ្វេតាមីនគ្រាប់ចំនួន ០៥គ្រាប់ និង៣. ឈ្មោះ នួន សុផន ភេទប្រុស អាយុ ២១ឆ្នាំ ជនជាតិខ្មែរ មុខរបរគ្មាន បច្ចុប្បន្នរស់នៅភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត រួមទាំងដកហូតបានថ្នាំញៀនមេតំហ្វេតាមីនទឹកកកចំនួន ០១កូនថង់ ទម្ងន់ ១.០៣ក្រាម។
ក្រោយការសាកសួរ ជនសង្ស័យបានសារភាពថា៖ ក្រុមខ្លួនបានទិញគ្រឿងញៀន ពីជនជាតិថៃ ដើម្បីយកមកទុកប្រើប្រាស់ តែមិនទាន់បានប្រើប្រាស់ក៏ជួបកម្លាំងសមត្ថកិច្ចឃាត់ខ្លួនតែម្តង។
បច្ចុប្បន្នជនសង្ស័យទាំង ០៣នាក់ និងវត្ថុតាង ត្រូវបានកម្លាំងជំនាញកសាងសំណុំបញ្ជូនទៅតុលាការ ដើម្បីចាត់ការទៅតាមនីតិវិធី ។