កំពង់ស្ពឺ៖ នៅវេលាម៉ោង ០១ និង ១៥នាទី ថ្ងៃទី ១៤ ខែតុលា ឆ្នាំ២០១៨ កម្លាំងមូលដ្ឋានកងរាជអាវុធហត្ថក្រុងច្បារមន បានចេញល្បាតនៅចំណុចមុខផ្ទះសំណាក់ជំនោររាត្រី ក្នុងភូមិទួលគោក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ក៏បានជួបជនសង្ស័យ ដែលជាមុខសញ្ញាចែកចាយគ្រឿងញៀនចំនួន០២នាក់មានឈ្មោះ ទូច សៅហៀង ភេទប្រុស រស់នៅភូមិទំនប់ ឃុំស្គុះ ស្រុកសំរោងទង ខេត្តកំពង់ស្ពឺ និងឈ្មោះ កូវ គីដា ភេទប្រុស រស់នៅភូមិកណ្តោលដុំ សង្កាត់កណ្តោលដុំ ក្រុងច្បារមន ខេត្តកំពង់ស្ពឺ រួមទាំងដកហូតបានវត្ថុតាងមាន៖ ថ្នាំម៉ាទឹកកកចំនួន ០៥កញ្ជប់តូច, ម៉ូតូ ០១គ្រឿង និងទូរស័ព្ទ ០១គ្រឿង។
ដោយមានការចង្អុលបង្ហាញពី លោក ឧត្តមសេនីយ៍ត្រី ជូ សារុន មេបញ្ជាការកងរាជអាវុធហត្ថខេត្ត និងលោក កែវ សុធា ព្រះរាជអាជ្ញាអមតុលាការខេត្តកំពង់ស្ពឺ ទទួលបានចម្លើយសារភាពរបស់ជនសង្ស័យទាំង០២នាក់ខាងលើរួចមក កម្លាំងកងរាជអាវុធហត្ថដឹកនាំដោយ លោកវរសេនីយ៍ត្រី ធី ឆៃ មេបញ្ជាការកងរាជអាវុធហត្ថក្រុងច្បារមន ក៏បន្តចុះទៅឆែកផ្ទះ ដោយឃាត់ខ្លួនជនសង្ស័យបានម្នាក់ទៀតឈ្មោះ ស៊ុន ភឹម ភេទប្រុស អាយុ ២៩ឆ្នាំ រស់នៅភូមិទំនប់ ឃុំស្គុះ ស្រុកសំរោងទង ខេត្តកំពង់ស្ពឺ រួមទាំងដកហូតបានថ្នាំម៉ាទឹកកកចំនួន ០៤កញ្ចប់ធំផងដែរ។
បច្ចុប្បន្នជនសង្ស័យ និងវត្ថុតាង ត្រូវបានបញ្ជូនទៅបញ្ជាការដ្ឋានកងរាជអាវុធហត្ថខេត្តកំពង់ស្ពឺ ដើម្បីកសាងសំណុំរឿងចាត់ការតាមនីតិវិធី។