រាជធានីភ្នំពេញ ៖ ប្រភពពត៌មានពីមេបញ្ជាការកងអាវុធហត្ថរាជធានីភ្នំពេញ លោកឧត្តមសេនីយ៍ឯក រ័ត្ន ស្រ៊ាង ប្រាប់ GRK News មុននេះបន្តិចថា ក្រុមជនល្មើសដែលពាក់ព័ន្ធក្នុងករណីបង្ក្រាបគ្រឿងញៀន ស្ថិតនៅខាងត្បូង រង្វង់មូលកាំកូស៊ីធី ផ្លូវលេខ៣៥១ ក្នុងសង្កាត់បឹងកក់១ ខណ្ឌទួលគោក ត្រូវបាន កម្លាំងអាវុធហត្ថរាជធានី និងអាវុធហត្ថខណ្ឌទួលគោក បង្ក្រាបបានជោគជ័យហើយដោយឃាត់ខ្លួនបានជនសង្ស័យចំនួន
០៥នាក់ ក្នុងនោះមេក្លោងគ្រឿងញៀនម្នាក់ត្រូវបានកម្លាំងរបស់លោកបាញ់ស្លាប់ ក្នុងពេលដែលជនល្មើស តដៃបាញ់តបតជាមួយ កម្លាំងអាវុធហត្ថ និងចាប់យកបានរថយន្ត ០១គ្រឿងម៉ាក អូឌី ពាក់ស្លាកលេខ ន.ប កាំភ្លើងចំនួន០៥ដើម និងវត្ថុតាងមួយចំនួនដែលកម្លាំងអាវុធហត្ថកំពុងឆែកឆេរ។ ប៉ុន្តែជា អកុសល កម្លាំងអាវុធហត្ថយើងម្នាក់ត្រូវបានស្លាប់ ដោយសារជនល្មើសបាញ់ស្របពេលកំពុងបំពេញភារកិច្ច។
ប្រតិបត្តិបង្ក្រាបជនជួញដូរគ្រឿងត្រូវបានបញ្ចប់នៅម៉ោងប្រមាណ ៥៖៤៥នាទី ថ្ងៃទី២៧ ខែមេសានេះ។
លោកឧត្តមសេនីយ៍ រ័ត្ន ស្រ៊ាង បានបញ្ជាក់ថា សម្រាប់សពមន្រ្តីអាវុធហត្ថដែលត្រូវក្រុមជនល្មើស គ្រឿងញៀន បាញ់ស្លាប់នោះត្រូវបានយកមកធ្វើបុណ្យនៅទីបញ្ជាការដ្ឋានអាវុធហត្ថរាជធានីភ្នំពេញ ខណៈជនល្មើស ទាំង០៥នាក់ត្រូវបាននាំខ្លួនទៅសួរនាំបន្តទៀត។