បន្ទាយមានជ័យ៖ ដោយមានការសម្របសម្រួលពីលោកស្រី ឆេង ហាក់ងិង ព្រះរាជអាជ្ញាររងអមសាលដំបូងខេត្ត នៅវេលាម៉ោង ២២ និង ៣០នាទី ថ្ងៃទី២៥ ខែកុម្ភៈ ឆ្នាំ២០១៩ នៅចំណុចភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ទោ អ៊ុ សាខន នាយរងសេនាធិការកងរាជអាវុធហត្ថខេត្ត បានដឹកនាំកម្លាំងចុះប្រតិបត្តិការ ឃាត់ខ្លួនជនសង្ស័យបានចំនួន ០១នាក់ -ឈ្មោះ រ៉េន ប៊ុនថន ភេទប្រុស អាយុ ៣១ឆ្នាំ ជនជាតិខ្មែរ បច្ចុប្បន្នស្នាក់នៅផ្ទះជួល ស្ថិតក្នុងភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត និងដកហូតវត្ថុតាងរួមមាន ៖ -គ្រឿងញៀនមេតំហ្វេតាមីនទឹកកកចំនួន ០២កូនថង់ -ទូរស័ព្ទដៃចំនួន ០២គ្រឿង -ប្រាក់រៀលចំនួន ៧០.០០០រៀល -ប្រាក់បាតចំនួន ១.០៧០បាត -កាបូបស្ពាយចំហៀង ចំនួន ០១ -កូនថង់សម្រាប់ច្រកគ្រឿងញៀនមួយចំនួន ។ ក្រោយទទួលបានចម្លើយសារភាពរបស់ជនសង្ស័យ លោកបានកសាងសំណុំរឿងបញ្ជូនជនសង្ស័យ ទៅទីបញ្ជាការដ្ឋានកងរាជអាវុធហត្ថខេត្ត ដើម្បីចាត់ការបន្តតាមនីតិវិធី ។