ព្រះវិហារ៖ ក្រោយពីបានទទួលបទបញ្ជាពីលោក ឧត្តមសេនីយ៍ត្រី កង សៅគុណ មេបញ្ជាការ កងរាជអាវុធហត្ថខេត្តព្រះវិហារ កាលពីវេលាម៉ោង ២១ និង ៤០នាទី ថ្ងៃទី០៥ ខែមីនា ឆ្នាំ២០១៩ នៅរង្វង់មូលថ្មី ក្នុងភូមិភារកិច្ច សង្កាត់ប៉ាលហាល ក្រុងព្រះវិហារ ខេត្តព្រះវិហារ កម្លាំងមូលដ្ឋានកងរាជអាវុធហត្ថក្រុងព្រះវិហារ ដឹកនាំដោយលោកវរសេនីយ៍ត្រី ចាន់ សុភិនណារ៉ា មេបញ្ជាការមូលដ្ឋានកងរាជអាវុធហត្ថក្រុងព្រះវិហារ ចុះអនុវត្តដីកាបង្គាប់ឲ្យចាប់ខ្លួនលេខ ០៧/២០១៩ ចុះថ្ងៃទី២២ ខែមករា ឆ្នាំ២០១៩ ចេញដោយចៅក្រមស៊ើបសួរឈ្មោះ សែត វិសិដ្ឋមុនី បានចុះបង្រ្កាបករណីរក្សាទុក ឬជួញដូរនូវសារធាតុញៀន ដោយឃាត់ខ្លួនជនសង្ស័យបានចំនួន ០១នាក់ ឈ្មោះ រស់ សាមឌី ភេទប្រុស អាយុ ៣៦ឆ្នាំ មុខរបរគ្រូកីឡា រស់នៅភូមិសំរោង សង្កាត់កំពង់ប្រណាក ក្រុងព្រះវិហារ ខេត្តព្រះវិហារ រួមទាំងដកហូតបានវត្ថុតាងមានម្សៅក្រាមពណ៌សថ្លា (ម៉ាទឹកកក) ចំនួន ០៣កញ្ចប់ និងទូរស័ព្ទដៃ ០១គ្រឿង។
បច្ចុប្បន្នជនសង្ស័យ និងវត្ថុតាង ត្រូវបានកម្លាំងជំនាញកងរាជអាវុធហត្ថ កសាងសំណុំរឿងបញ្ជូនទៅសាលាដំបូងខេត្តព្រះវិហារ ចាត់ការបន្តតាមនីតិវិធី។