រាជធានីភ្នំពេញៈ ជនសង្ស័យមួយក្រុមបានប្រើដំបងដេញវាយប្លន់ម៉ូតូគូសង្សារមួយគូខណៈ កំពុងជិះម៉ូតូតាមបណ្ដោយផ្លូវលេខ១៨២ ស្ថិតក្នុងសង្កាត់ទឹកល្អក់៣ ខណ្ឌទួលគោក កាលពីវេលាម៉ោង៣ និង១០នាទីទៀបភ្លឺ ថ្ងៃទី១៣ ខែឧសភា ឆ្នាំ២០១៦ ។
ជនរងគ្រោះទាំង០២នាក់មិនបានត្រូវគេស្គាល់អត្តសញ្ញាណឡើយ ដោយជិះម៉ូតូ១គ្រឿង ម៉ាកស្កុបពី ស៊េរីឆ្នាំ២០១៣ ពណ៌ស ពាក់ស្លាកលេខ ភ្នំពេញ 1BV-1759 ។ ចំណែកជនសង្ស័យមានគ្នា០៤នាក់ ជិះម៉ូតូ០២គ្រឿងម៉ាកលេត ពណ៌ស ០១គ្រឿង និងម៉ាកស្កុបពី ពណ៌ស ០១គ្រឿង ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញសង្សារមួយគូនេះជិះម៉ូតូស្កុកពីតាមបណ្ដោយ ផ្លូវលេខ១៨២ ក្នុងទិសដៅពីកើតទៅលិច លុះដល់កន្លែងកើតហេតុស្រាប់តែលេចម៉ូតូជនសង្ស័យ២គ្រឿង គ្នា០៤នាក់ ប្រដាប់ដោយដំបង ដេញមកពីក្រោយជនរងគ្រោះ ហើយបានដេញវាយជនរងគ្រោះបម្រុងប្លន់យកម៉ូតូ តែមិនបានសំរេចទេ ដោយសារជនរងគ្រោះបានព្យាយាមជិះចូលទៅកន្លែងមានមនុស្សច្រើន និងស្រែកឲ្យគេជួយ ហើយភ្លាមៗនោះជនសង្ស័យទាំងនោះបានបោះចោលដំបង ហើយជិះម៉ូតូរត់គេចខ្លួនបាត់ស្រមោលអស់ ៕
បញ្ជាក់ ៖ បើបងប្អូនណាប្រទះឃើញជនសង្ស័យដែលមានភិនភាគដូចបានរៀបរាប់ខាងលើ សូមមេត្តារាយការណ័ទៅកាន់អាជ្ញាធរមូលដ្ឋានដែល នៅជិតលោកអ្នកបំផុត។