កំពត៖ នៅវេលាម៉ោង ១១ និង ៤៥នាទី ថ្ងៃទី២៦ ខែមេសា ឆ្នាំ២០១៩ កម្លាំងការិយាល័យប្រឆាំងបទល្មើសគ្រឿងញៀន នៃមន្ទីរយុត្តិធម៌កងរាជអាវុធហត្ថខេត្តកំពត ដឹកនាំដោយលោក វរសេនីយ៍ទោ ហែម ចាន់ដារ៉ា មេបញ្ជាការរង ទទួលផែនយុត្តិធម៌ សហការជាមួយកងរាជអាវុធហត្ថខេត្តកែប បានចុះបង្ក្រាបករណីជួញដូរ និងប្រើប្រាស់គ្រឿងញៀន នៅចំណុចភូមិកោះស្នា ឃុំឫស្សីស្រុកខាងលិច ស្រុកកំពង់ត្រាច ខេត្តកំពត ដោយឃាត់ខ្លួនជនសង្ស័យបានចំនួន ០២នាក់មានឈ្មោះ ហេង ដារ៉ូ ភេទប្រុស អាយុ ៣០ឆ្នាំ មុខរបរជាងសំណង់ រស់នៅភូមិពងទឹក ឃុំភ្នំលាវ ស្រុកដំណាក់ចង្អើរ ខេត្តកែប និងឈ្មោះ តែម ពេក ភេទប្រុស អាយុ ២៩ឆ្នាំ មុខរបរមិនពិតប្រាកដ រស់នៅភូមិ ឃុំជាមួយគ្នា រួមទាំងដកហូតបានវត្ថុតាងគ្រឿងញៀនចំនួន ១០កញ្ចប់, ទូរស័ព្ទដៃ ០១គ្រឿង, ប្រាក់រៀលចំនួន ១៥០,០០០រៀល និងឧបករណ៍សេពគ្រឿងញៀនមួយចំនួនទៀត។
បច្ចុប្បន្នជនសង្ស័យ និងវត្ថុតាង ត្រូវបានកម្លាំងជំនាញសាងសំណុំរឿងបញ្ជូនទៅសាលាដំបូងខេត្តដើម្បីបន្តតាមនីតិវិធី។