ក្រចេះ៖ ដោយមានការសម្របសម្រួលនីតិវិធីពី លោក កែវ សុជាតិ ព្រះរាជអាជ្ញា អមសាលាដំបូងខេត្តក្រចេះ កាលពីវេលាម៉ោង ១៦ និង ១០នាទី ថ្ងៃទី១០ ខែឧសភា ឆ្នាំ២០១៩ កម្លាំងមូលដ្ឋានកងរាជអាវុធហត្ថក្រុងក្រចេះ ដឹកនាំដោយលោកវរសេនីយ៍ត្រី ផាត សុភ័ក្រ្តវាសនា មេបញ្ជាការ កងរាជអាវុធហត្ថក្រុងក្រចេះ សហការជាមួយកម្លាំងមន្ទីរយុត្តិធម៌ កងរាជអាវុធហត្ថខេត្ត និងស្នាក់ការ៧០៧ បានចុះបង្ក្រាបករណីគ្រឿងធាតុញៀន នៅចំណុចភូមិសំបួរសែនជ័យ ឃុំស្វាយជ្រះ ស្រុកស្នួល ខេត្តក្រចេះ ដោយឃាត់ខ្លួនជនសង្ស័យចំនួន ០៣នាក់ រួមមាន៖
១. ឈ្មោះ សារី លីណា ភេទស្រី អាយុ ២៩ឆ្នាំ រស់នៅភូមិសំបួរសែនជ័យ ឃុំស្វាយជ្រះ ស្រុកស្នួល ខេត្តក្រចេះ។
២. ឈ្មោះ រូង សុគា ភេទស្រី អាយុ ២៦ឆ្នាំ រស់នៅភូមិស្រែដូនក្រៅ ឃុំកន្ទួត ស្រុកស្នួល ខេត្តក្រចេះ។
៣. ឈ្មោះ ម៉ាត់ សេត ប្រុសភេទ អាយុ ២១ឆ្នាំ រស់នៅភូមិស្លាភ្នំ ឃុំទុនលូង ស្រុកម៉េមុត ខេត្តត្បូងឃ្មុំ រួមទាំងដកហូតបានវត្ថុតាងមាន៖ ម្សៅក្រាមពណ៌ស (ម៉ាទឹកកក) ចំនួន ៥០កញ្ចប់តូច, ម៉ូតូចំនួន ០១គ្រឿង និងទូរស័ព្ទចំនួន ០១គ្រឿង។
បច្ចុប្បន្នជនសង្ស័យ និងវត្ថុតាង ត្រូវបានមន្ត្រីជំនាញកងរាជអាវុធហត្ថខេត្ត កសាងសំណុំរឿងដើម្បីចាត់ការបន្តតាមនីតិវិធី។