ក្រចេះ ៖ ដោយមានការសម្របសម្រួលនីតិវិធីពី លោកកែវ សុជាតិ ព្រះរាជអាជ្ញាអមសាលាដំបូងខេត្តក្រចេះ នៅថ្ងៃទី២១ ខែឧសភា ឆ្នាំ២០១៩ វេលាម៉ោង ១២ និង ០០នាទី កម្លាំងមូលដ្ឋាន កងរាជអាវុធហត្ថក្រុងក្រចេះ សហការជាមួយកម្លាំងកងរាជអាវុធហត្ថខេត្ត និងមូលដ្ឋានកងរាជអាវុធហត្ថស្រុកឆ្លូង ដឹកនាំដោយលោក វរសេនីយ៍ត្រី ផាត សុភក្រ្ត័វាសនា មេបញ្ជាការ មូលដ្ឋានកងរាជអាវុធហត្ថក្រុងក្រចេះ ចុះបង្ក្រាបករណីគ្រឿងញៀន នៅចំណុចភូមិព្រែកចំឡាក់ ឃុំកញ្ជរ ស្រុកឆ្លូង ខេត្តក្រចេះ ដោយឃាត់ខ្លួនបានជនសង្ស័យចំនួន ០៣នាក់ រួមមាន៖
១. ឈ្មោះ លីម បញ្ញា ភេទប្រុស អាយុ ២៣ឆ្នាំ ជនជាតិខ្មែរ មុខរបរកសិករ រស់នៅភូមិព្រែកចម្លាក់ ឃុំកញ្ជរ ស្រុកឆ្លូង ខេត្តក្រចេះ។
២. ឈ្មោះ ង៉ែត សម្បត្តិ ភេទប្រុស អាយុ ២០ឆ្នាំ ជនជាតិខ្មែរ មុខរបរកសិករ រស់នៅភូមិព្រែកចំឡាក់ ឃុំកញ្ជរ ស្រុកឆ្លូង ខេត្តក្រចេះ។
៣. ឈ្មោះ លីម លីតាន ភេទស្រី អាយុ ១៩ឆ្នាំ ជនជាតិខ្មែរ មុខរបរកសិករ រស់នៅភូមិព្រែកចំឡាក់ ឃុំកញ្ជរ ស្រុកឆ្លូង ខេត្តក្រចេះ។
ក្នុងប្រតិបត្តិការនោះ កម្លាំង ដកហូតបានវត្ថុតាងមាន៖ ម្សៅក្រាមពណ៌ស(ម៉ាទឹកកក) ចំនួន ០៤កញ្ចប់ (ធំ០៣ តូច០១), ថ្នាំគ្រាប់ពណ៌ផ្កាឈូក ០១កូនថង់ មាន ២៥គ្រាប់, ដាវ ០២ដើម, កាំបិត ០២ (ធំ០១ តូច០១), ដែកកេះ០៣, ម៉ូតូ ០២គ្រឿង, លោហធាតុពណ៌លឿងកាឡៃ (ខ្សែដៃ) ០១ខ្សែ, ថង់សំរាប់វេចខ្ចប់ និងសម្ភារៈប្រើប្រាស់សារធាតុញៀនមួយចំនូនទៀត។
បច្ចុប្បន្នជនសង្ស័យ និងវត្ថុតាង ត្រូវបានកម្លាំងជំនាញ បញ្ជូនទៅមូលដ្ឋានកងរាជអាវុធហត្ថក្រុងក្រចេះ ដើម្បីចាត់ការបន្តតាមនីតិវិធី។