អហផទ៖ កងរាជអាវុធហត្ថ ជាអង្គភាពមួយក្នុងចំណោមកងឯកភាពនៃកងយោធពលខេមរភូមិន្ទ។ កងរាជអាវុធហត្ថបានបង្កើតស្នាដៃនិងសមិទ្ធផលជាច្រើនក្នុងការរួមចំណែកជាមួយកងយោធពលខេមរភូមិន្ទនិងប្រទេសជាតិ។ នៅទូទាំងប្រទេសកម្ពុជា កងរាជអាវុធហត្ថបានសាងសង់ជំរុំជម្រតាមបណ្តាបញ្ជាការដ្ឋានកងរាជអាវុធហត្ថរាជធានី ខេត្ត រហូតដល់ក្រុង ស្រុក ខណ្ឌ និងស្នាក់ការសន្តិសុខផងដែរ។ ជាក់ស្តែង អគាររដ្ឋបាលនៃបញ្ជាការដ្ឋានកងរាជអាវុធហត្ថលើផ្ទៃប្រទេស ដែលមានទំហំ ១៤ម៉ែត្រ គុណនឹង៧០ម៉ែត្រ កម្ពស់៩ជាន់ ចាប់ផ្តើមសាងសង់ក្នុងឆ្នាំ២០១៣ មកដល់ពេលនេះជិតរួចរាល់ជាស្ថាពរហើយ។ លោក ឧត្តមសេនីយ៍ត្រី សូវ ពុទ្ធា នាយការិយាល័យវិស្វកម្ម ស្នងការដ្ឋានភស្តុភារ កងរាជអាវុធហត្ថលើផ្ទៃប្រទេស បានប្រាប់មកអ្នកសារព័ត៌មានកងរាជងអាវុធហត្ថថា អគាររដ្ឋបាលនេះ នឹងសាងសង់រួចរាល់ជាស្ថាពរនៅចុងខែសីហានេះ។ នាយ នាយរង និងពលអាវុធហត្ថនៃបញ្ជាការដ្ឋានកងរាជអាវុធហត្ថលើផ្ទៃប្រទេស អបអរសាទរនិងមានអារម្មណ៍សប្យាយរីករាយយ៉ាងខ្លាំងដែលទទួលបាននូវព័ត៌មាននេះ។ ក្នុងនាមខ្ញុំបាទជាអាវុធហត្ថមួយរូប ខ្ញុំបាទមានសេចក្តីសោមនស្សរីករាយក្រៃលែងដែលនឹងទទួលបានបន្ទប់ធ្វើការថ្មីហើយស្អាត់បែបនេះ។ ទន្ទឹមនឹងនេះ នាយទាហាន នាយទាហានរង និងពលទាហាននៃកងរាជអាវុធហត្ថលើផ្ទៃប្រទេស សូមថ្លែងអំណរគុណដល់ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទនិងជាមេបញ្ជាការកងរាជអាវុធហត្ថលើផ្ទៃប្រទេស ដែលបានផ្តូចផ្តើមនិងចូលរួមចំណែកថវិកាផ្ទាល់ខ្លួន ព្រមទាំងបានបំផុសចលនាដល់នាយទាហាននៃកងរាជអាវុធហត្ថ ក៏ដូចជាសម្បុរសជនចូលរួមជាថវិកានិងសម្ភារៈក្នុងការកសាងអគារនេះ។
