ស្វាយរៀង៖ ព្រឹកថ្ងៃសុក្រ ទី២២ ខែវិច្ឆិកា ឆ្នាំ២០១៩ លោក វរសេនីយ៍ឯក តូច សាវឿន មេបញ្ជាការរង ទទួលផែការងារកសាងកម្លាំង តំណាងលោក ឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀង បានដឹកនាំក្រុមការងារយកថវិកាមូលនិធិមហាគ្រួសារកងរាជអាវុធហត្ថខេត្តស្វាយរៀង ចំនួន ១៤,៣៤៥,០០០៛ (ដប់បួនលានបីសែនបួនម៉ឺនប្រាំពាន់រៀល) ទៅប្រគល់ជូន លោកវរសេនីយ៍ឯក ភេ សាវឿន អតីតនាយលេខាធិការដ្ឋាន ដែលបានចូលសោធននិវត្តន៍ កាលពីថ្ងៃទី០៤ ខែតុលា ឆ្នាំ២០១៩ ហើយមានជំងឺប្រចាំកាយ កំពុងសម្រាកព្យាបាលនៅផ្ទះ ជាគោលនយោបាយ និងលើកទឹកចិត្តដល់នាយទាហានដែលមានស្នាដៃល្អក្នុងការបម្រើការងារក្នុងអង្គភាពកងរាជអាវុធហត្ថខេត្តស្វាយរៀងកន្លងមក។
មូលនិធិមហាគ្រួសារកងរាជអាវុធហត្ថជាការផ្ដើមគំនិតដ៏ខ្ពង់ខ្ពស់ និងការដឹកនាំដ៏ឈ្លាសវៃរបស់លោក នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ទើបលោកឧត្តមសេនីយ៍ត្រី សែ វុទ្ធី មេបញ្ជាការ កងរាជអាវុធហត្ថខេត្តស្វាយរៀង បានបង្កើតជាមូលនិធិមហាគ្រួសារកងរាជអាវុធហត្ថខេត្តស្វាយរៀង សម្រាប់យោធិនចូលនិវត្តន៍របស់នាយទាហាន នាយទាហានរងកងរាជអាវុធហត្ថខេត្ត។
