ស្ទឹងត្រែងៈ នៅវេលាម៉ោង២១ និង០០នាទី ថ្ងៃទី២៣ ខែកក្កដា ឆ្នាំ២០១៦ កម្លាំងមូលដ្ឋានកងរាជអាវុធហត្ថស្រុកថាឡាបរិវ៉ាត់ បានធ្វើការឃាត់ខ្លួនជនសង្ស័យម្នាក់ ពាក់ព័ន្ធករណីរក្សាទុក និងចែកចាយនូវសារធាតុញៀនត្រង់ ស្ថិតនៅចំណុចភូមិឆ្វាំង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង។ កម្លាំងបានឱ្យដឹងថា ជនសង្ស័យដែលត្រូវឃាត់ខ្លួនមានឈ្មោះ ដុង វិនៅ ភេទប្រុស អាយុ២៨ឆ្នាំ ជាតិខ្មែរ មុខរបរ សិប្បកម្មឈើ និងជាអ្នករាយការណ៍សារព័ត៌មានអង្គរកម្ពុជា ស្នាក់នៅភូមិឆ្វាំង ឃុំសំអាង ខេត្តស្ទឹងត្រែង។
កម្លាំងមូលដ្ឋានកងរាជអាវុធហត្ថស្រុកថាឡាបរិវ៉ាត់ បានបន្តឱ្យដឹងទៀតថា បន្ទាប់ពីធ្វើការឃាត់ខ្លួន កម្លាំងបានធ្វើការសាកសួរជនសង្ស័យនូវបក្ខពួករបស់ខ្លួនជាបន្ត ជនសង្ស័យក៏បានសារភាពថា ខ្លួនមានបក្ខពួកចំនួន០២នាក់។ បន្ទាប់ពីកម្លាំងបានដឹងនូវអាស័យដ្ឋានរបស់ជនសង្ស័យដែលជាបក្ខពួក កម្លាំងក៏បានសុំការអនុញ្ញាតពីលោកព្រះរាជអាជ្ញា ដើម្បីឆែកឆេរលំនៅឋានជនសង្ស័យនោះ ជាលទ្ធផលកម្លាំងក៏បានឃាត់ខ្លួនជនសង្ស័យទាំង០២នាក់នោះ ដែលមានឈ្មោះ៖
០១. សន សីហា ភេទប្រុស អាយុ២៦ ជាតិខ្មែរ មុខរបរកម្មករ ផ្ទះនៅភូមិសុង ឃុំសុង ស្រុកសំឡូត ខេត្តបាត់ដំបង។
០២. ប៊ុត រស្មី ភេទប្រុស អាយុ១៧ ជាតិខ្មែរ មុខរបរ ធ្វើស្រែ ផ្ទះនៅភ្នំក្រហម ភូមិអូរឬស្សីកណ្ដាល ឃុំអូរឬស្សីកណ្ដាល ស្រុកសៀមបូក ខេត្តស្ទឹងត្រែង។
កម្លាំងបានចាប់យកវត្ថុតាងមួយចំនួនពីជនសង្ស័យរួមមាន៖
០១. ថ្នាំញៀនប្រភេទម៉ាទឹកកកចំនួន ០៦កញ្ចប់ ដែលមានទម្ងន់ស្មើ ១.១១ក្រាម
០២. ម៉ូតូចំនួន ០១គ្រឿង
០៣. ទូរស័ព្ទចំនួន ០៣គ្រឿង
ជនសង្ស័យ និងវត្ថុតាងត្រូវកម្លាំងមូលដ្ឋានកងរាជអាវុធហត្ថស្រុកថាឡាបរិវ៉ាត់ កំពុងសាកសួរបន្ត និងកសាងសំណុំរឿងដើម្បីបញ្ចូនបន្តតាមនីតិវិធី។