ព្រះសីហនុៈ វេលាម៉ោង០៩ និង៤០នាទី ថ្ងៃទី០១ ខែសីហា ឆ្នាំ២០១៦ កម្លាំងមូលដ្ឋានកងរាជអាវុធហត្ថស្រុកកំពង់សីលា បានធ្វើការឃាត់ខ្លួនបុរសជាជនសង្ស័យម្នាក់ ពាក់ព័ន្ធករណីលួច ស្ថិតនៅចំណុចគីឡូម៉ែតលេខ១១២-១១៣ភូមិស្ទឹងច្រាល ស្រុកកំពង់សិលា ខេត្តព្រះសីហនុ។
បើតាមសំដីភ្នាក់ងារ GRK News បានឱ្យដឹងថា កម្លាំងកងរាជអាវុធហត្ថបានធ្វើការឃាត់ខ្លួនតាមដីកា បង្គាប់អោយនាំខ្លួនលេខ៤១តពដ/៩១៦ ចុះថ្ងៃទី២៩ ខែកក្កដា ឆ្នាំ២០១៦ របស់ចៅក្រមស៊ើបសួរ អមសាលាដំបូងខេត្ត ពាក់ព័ន្ធករណីលួចគាស់ទូកុងតឺន័រ ដែលប្រព្រឹត្តកាលពី ថ្ងៃទី១៩ ខែកុម្ភះ ឆ្នាំ២០១៦ ស្ថិតនៅចំណុចគីឡូម៉ែតលេខ ១១២-១១៣ ភូមិស្ទឹងច្រាល ស្រុកកំពង់សិលា។
ភ្នាក់ងារបានបន្តប្រាប់ឱ្យដឹងទៀតថា ជនសង្ស័យដែលត្រូវឃាត់ខ្លួននោះមានឈ្មោះ នាង ពិតូ ភេទប្រុស អាយុ២១ឆ្នាំ មុខរបរបើកឡានដឹកទំនិញ រស់នៅភូមិស្ទឹងច្រាល ស្រុកកំពង់សិលា ខេត្តព្រះសីហនុ។
ជនសង្ស័យ ត្រូវកម្លាំងកងរាជអាវុធហត្ថស្រុកកំពង់សីលា កំពុងសាកសួរនូវបក្ខពួកបន្ថែម និងកសាងសំណុំរឿង ដើម្បីចាត់ការបន្តតាមនីតិវិធី។