សៀមរាបៈ វេលាម៉ោង២០ និង៤០នាទី ថ្ងៃទី៣១ ខែកក្កដា ឆ្នាំ២០១៦ កម្លាំងមូលដ្ឋានកងរាជអាវុធហត្ថក្រុងសៀមរាប បានធ្វើការឃាត់ខ្លួនជនសង្ស័យចំនួន០៦នាក់ ពាក់ព័ន្ធករណីរក្សាទុក និងចែកចាយនូវសារធាតុញៀន ស្ថិតនៅចំណុចភូមិសាលាកន្សែង សង្កាត់ស្វាយដង្គំ ក្រុងសៀមរាប ។

បើតាមសំដីភ្នាក់ងារ GRK News បានឱ្យដឹងថា ជនសង្ស័យទាំង០៦នាក់នោះ គឺជាជនសកម្ម ក្នុងការប្រើប្រាស់ និងចែកចាយនូវសារធាតុញៀន ស្ថិតនៅចំណុចកន្លែងកើតហេតុខាងលើ។ ភ្នាក់ងារដដែលបានប្រាប់ថា មុននឹងឈានទៅដល់ការចាប់ខ្លួនជនសង្ស័យទាំង០៦នាក់នោះ កម្លាំងកងរាជអាវុធហត្ថ បានធ្វើការតាមដាននូវសកម្មភាពជនសង្ស័យទាំងនោះជាយូរថ្ងៃមកហើយ លុះដល់ថ្ងៃកើតហេតុ កម្លាំងក៏បានធ្វើការឃាត់ខ្លួនជនសង្ស័យនោះភ្លាមៗ ស្របពេលពួកគេកំពុងធ្វើសកម្មភាពចែកចាយ នូវសារធាតុញៀន ។

ភ្នាក់ងារដដែលបានបន្តប្រាប់ថា កម្លាំងបានចាប់យកវត្ថុតាងមួយចំនួនពីជនសង្ស័យរួមមានៈ
០១. ថ្នាំញៀនប្រភេទម៉ាទឹកកក ចំនួន១៥កញ្ចប់ ដែលមានទម្ងន់ ៣.៧៨ក្រាម
០២.ទូរស័ព្ទដៃចំនួន ០៥គ្រឿង
០៣. កាបូបចំនួន ០១។

ជនសង្ស័យ និងវត្ថុតាង ត្រូវកម្លាំងកងរាជអាវុធហត្ថក្រុងសៀមរាប កំពុងសាកសួរបក្ខពួកបន្ថែម និងកសាងសំណុំរឿង ដើម្បីចាត់ការបន្តតាមនីតិវិធី។