សៀមរាបៈ ដោយមានការផ្តល់ដំណឹងពីប្រជាពលរដ្ឋ ថាមានយុវជនមួយក្រុមកំពុងធ្វើការជួបជុំគ្នា ដើម្បីជួញដូរនូវសារធាតុញៀន ស្ថិតនៅចំណុចភូមិខ្នារថ្មី សង្កាត់ជ្រាវ ក្រុងសៀមរាប នៅវេលាម៉ោង២១ និង៤០នាទី ថ្ងៃទី០៣ ខែសីហា ឆ្នាំ២០១៦ កម្លាំងកងរាជអាវុធហត្ថក្រុងសៀមរាប ក៏បានចុះទៅចំណុចកើតហេតុដែលប្រជាពលរដ្ឋបានផ្តល់ដំណឹងភ្លាមៗ ដោយធ្វើការឃាត់ខ្លួនបានជនសង្ស័យចំនួន០៤នាក់ ។

បើតាមសំដីភ្នាក់ងារ GRK News បានឱ្យដឹងថា ជនសង្ស័យទាំង០៤នាក់នោះ គឺត្រូវបានឃាត់ខ្លួន ស្របពេលដែលប្រជាពលរដ្ឋប្រទះឃើញពួកគេ កំពុងធ្វើសកម្មភាពជួញដូរ នូវសារធាតុញៀន ក៏បានផ្តល់ដំណឹងមកកាន់កម្លាំងកងរាជអាវុធហត្ថក្រុងសៀមរាប អោយមកជួយធ្វើអន្តរាគមន៍បង្ក្រាបភ្លាមៗ។

ភ្នាក់ងារដដែលបានប្រាប់បន្តទៀតថាជនសង្ស័យដែលត្រូវកម្លាំងធ្វើការឃាត់ខ្លួនមានឈ្មោះ ៈ
០១. សាមុត សាន់យ៉ា ភេទប្រុស អាយុ៣០ឆ្នាំ មុខរបរ រត់ម៉ូតូបោកអ៊ុត ទីលំនៅភូមិខ្នារ សង្កាត់ជ្រាវ ក្រុងសៀមរាប
០២. ជុង វណ្ណា ភេទប្រុស អាយុ១៧ឆ្នាំមុខរបរកម្មករ ទីលំនៅភូមិខ្នារ សង្កាត់ជ្រាវ ក្រុងសៀមរាប
០៣. គិន សង់ ភេទប្រុស អាយុ១៥ឆ្នាំ មុខរបរលាងម៉ូតូ ទីលំនៅភូមិខ្នារ សង្កាត់ជ្រាវ ក្រុងសៀមរាប
០៤. ចាន់ ស៊ីវុង ភេទប្រុស អាយុ១៨ឆ្នាំមុខរបរគ្មាន ទីលំនៅភូមិខ្នារ សង្កាត់ជ្រាវ ក្រុងសៀមរាប

ក្នុងនោះផងដែរកម្លាំងបានធ្វើការចាប់យកវត្ថុតាងមួយចំនួនរួមមានៈ
០១. ថ្នាំញៀនប្រភេទម៉ាទឹកកក ចំនួន១២កញ្ចប់ ដែលមានទម្ងន់ស្មើ ១.៦៦ក្រាម
០២. កញ្ឆាក្រៀមចំនួន ០១កញ្ចប់
០៣.ទូរស័ព្ទដៃចំនួន ០៦គ្រឿង
០៤. ជញ្ជីងថ្លឹងចំនួន ០១គ្រឿង
០៥. កាំបិតចំនួន០១ និងពូថៅចំនួន០១

ជនសង្ស័យ និងវត្ថុតាង ត្រូវកម្លាំងកងរាជអាវុធហត្ថក្រុងសៀមរាប កំពុងសាកសួរ និងកសាងសំណុំរឿង ដើម្បីចាត់ការបន្តតាមនីតិវិធី។