កែប៖ នៅវេលាម៉ោង ១២ និង ២៥នាទី ថ្ងៃទី១៧ ខែធ្នូ ឆ្នាំ២០២០ មានករណី គំរាមសម្លាប់ និងធ្វើឱ្យខូចខាតដោយចេតនាទ្រព្យសម្បត្តិអ្នកដទៃមួយកើតឡើងស្ថិតនៅភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប ពេលទទួលបានពាក្យបណ្តឹងពីឈ្មោះ ទេព ឡា ភេទប្រុស អាយុ៣៨ឆ្នាំ មុខរបរកសិករ រស់នៅភូមិ ឃុំកើតហេតុខាងលើ កម្លាំងអាវុធស្រុក ដឹកនាំដោយលោក អនុសេនីយ៍ឯក អ៊ូ វណ្ណារិទ្ធិ មេបញ្ជាការស្រុក បានចុះទៅដល់កន្លែងកើតហេតុ បានឃើញជនសង្ស័យឈ្មោះ នាក់ រួន ភេទប្រុស អាយុ៣៤ឆ្នាំ មុខរបរកសិករ រស់នៅភូមិឃុំកើតហេតុខាងលើ កំពុងធ្វើសកម្មភាព កាន់កាំបិតផ្គាក់ ប្រវែង១ មែត្រ កាប់ដើមស្វាយ ខូចខាតចំនួន៣០ ដើមនិងដើមចេក ចំនួន២០ដើម ក៏បានឃាត់ខ្លួនជនសង្ស័យនិងវត្ថុតាង បញ្ជួនមកបញ្ជាការដ្ឋានកងរាជអាវុធហត្ថខេត្តដើម្បីចាត់ការតាមនីតិវិធី ។