ស្ទឹងត្រែងៈ នៅវេលាម៉ោង១១ និង០០នាទី ថ្ងៃទី០៥ ខែសីហា ឆ្នាំ២០១៦ កម្លាំងមូលដ្ឋានកងរាជអាវុធហត្ថស្រុកក្រឡាបរិវ៉ាត់ បានធ្វើការឃាត់ខ្លួនមេខ្លោងជួញដូរគ្រឿងញៀន ដ៏សកកម្មម្នាក់ ស្ថិតនៅចំណុចភូមិស្រែឫស្សី ឃុំស្រែឫស្សី ស្រុកក្រឡាបរិវ៉ាត់ ខេត្តស្ទឹងត្រែង ។
បើតាមសំដីមន្ត្រីកងរាជអាវុធហត្ថខេត្ត បានឱ្យដឹងថា ជនសង្ស័យដែលត្រូវចាប់ខ្លួននោះមានឈ្មោះ វ៉ាន់ ឌីអូន ភេទប្រុស អាយុ៤៨ឆ្នាំ ជនជាតិខ្មែរ មុខរបរមិនពិតប្រាកដ រស់នៅភូមិហាធីឃូន ឃុំហាធីឃូន ស្រុកមឿងខួង ខេត្តចំប៉ាសាក់ ប្រទេសឡាវ។

មន្ត្រីកងរាជអាវុធហត្ថខេត្ត បានឱ្យដឹងទៀតថា មុននឹងឈានទៅដល់ការឃាត់ខ្លួនជនសង្ស័យនេះ កម្លាំងកងរាជអាវុធហត្ថបានធ្វើការតាមដាន និងកំណត់មុខសញ្ញាជាយូរមកហើយ។

មន្ត្រីដដែលបានបន្តប្រាប់ថា កម្លាំងបានចាប់យកវត្ថុតាងមួយចំនួនពីជនសង្ស័យរួមមានៈ
០១. ថ្នាំញៀនប្រភេទម៉ាទឹកកក ចំនួន០១កញ្ចប់ ដែលមានទម្ងន់ ០១គីឡូក្រាម
០២.ទូរស័ព្ទដៃចំនួន ០១គ្រឿង
០៣. រថយន្តចំនួន ០១គ្រឿង។

ជនសង្ស័យ និងវត្ថុតាង ត្រូវកម្លាំងកងរាជអាវុធហត្ថខេត្តស្ទឹងត្រែង កំពុងសាកសួរ និងស្វែងរកតាមចាប់នូវបក្ខពួកបន្ថែម ដើម្បីចាត់ការតាមផ្លូវច្បាប់។