ភ្នំពេញៈ ជនសង្ស័យជាចោរឆក់កាបូបម្នាក់ ត្រូវបានកម្លាំងមូលដ្ឋានកងរាជអាវុធហត្ថខណ្ឌដូនពេញ ធ្វើការឃាត់ខ្លួន ស្ថិតនៅចំណុចផ្លូវ២០០ កែងមុនីវង្ស (មុខហាងតាយតាយ) សង្កាត់បឹងរាំង ខណ្ឌដូនពេញ កាលពីវេលាម៉ោង២៣ៈ៣០នាទី យប់ថ្ងៃទី០៧ ខែសីហា ឆ្នាំ២០១៦ កន្លងទៅ ស្របពេលដែលគេកំពុងធ្វើសកម្មភាព។

បើតាមប្រភពពត៌មានពីភ្នាក់ងារ GRK News បានឱ្យដឹងថា កម្លាំងបានធ្វើការសាកសួរ ជនសង្ស័យពីអំពើឆក់នេះ ជនសង្ស័យបានសារភាពថា ខ្លួនមានបក្ខពួកចំនួន០២នាក់ និងបានជិះតាមនារីដែលជាជនរងគ្រោះមួយសន្ទុះធំ លុះចំណុចកើតហេតុខាងលើ ស្របពេលស្ថានភាពផ្លូវស្ងាត់អំណោយផល ខ្លួនក៏បានធ្វើសកម្មភាពឆក់ តែម្តង។

បន្ទាប់ពី ឆក់បានសម្រេចមក ខ្លួនក៏បានជិះរត់គេចខ្លួន ប៉ុន្តែសំណាងអាក្រក់ក៏ជួបនិងកម្លាំងល្បាត កងរាជអាវុធហត្ថខណ្ឌដូនពេញ ក៏ជិះដេញតាមឃាត់ខ្លួនតែម្តង។

ភ្នាក់ងារបានបន្តទៀតថា កម្លាំងបានចាប់យកវត្ថុតាងមួយចំនួនពីជនសង្ស័យរួមមានៈ
០១. ម៉ូតូចំនួន ០១គ្រឿង ( របស់ជនល្មើស )
០២. កាបូប ០១ ( របស់ជនរងគ្រោះ )
០៣. លុយខ្មែរចំនួន ៤០ម៉ឺនរៀល និងឯកសារមួយចំនួន ។ ( របស់ជនរងគ្រោះ )

ជនសង្ស័យ ត្រូវកម្លាំងមូលដ្ឋានកងរាជអាវុធហត្ថខណ្ឌដូនពេញ កំពុងសាកសួរបន្ថែម និងកសាងសំណុំរឿងបញ្ចូនបន្ត ដើម្បីចាត់ការតាមនីតិវិធី ចំណែកវត្ថុតាងរបស់ជនរងគ្រោះ ត្រូវបានប្រគល់ជូនជនរងគ្រោះវិញ៕