កំពង់ធំ៖ ដោយបានការអនុញ្ញាតពី លោក ឧត្តមសេនីយ៍ត្រី មាស យ៉ត មេបញ្ជាការកងរាជអាវុធហត្ថខេត្តកំពង់ធំ កម្លាំងមន្ទីរស្រាវជ្រាវ និងបង្ក្រាបបទល្មើសកងរាជអាវុធហត្ថខេត្តកំពង់ធំ ដឹកនាំដោយលោកវរសេនីយ៍ទោ ផុន សុផល ប្រធានមន្ទីរស្រាវជ្រាវ និងបង្ក្រាបបទល្មើស បានចុះស្រាវជ្រាវ និងបង្ក្រាបទល្មើសប្រើប្រាស់ និងចាត់ចែងនៅសារធាតុញៀនដោយខុសច្បាប់ នៅថ្ងៃទី១៦ ខែសីហាឆ្នាំ ២០២៣ នៅចំណុចភូមិតារាម ឃុំត្បែងស្រុកកំពង់ និងចំណុចភូមិអាចារ្យលាក់ សង្កាត់អាចារ្យលាក់ និងចំណុចភូមិស្លាកែត សង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំ។ ជាលទ្ធផលបានឃាត់ខ្លួនជនសង្ស័យបានចំនួនពីរនាក់ និងចាប់យកវត្ថុតាងពាក់ព័ន្ធមួយចំនួន។…

កំពង់ឆ្នាំង៖ នៅវេលាម៉ោង ៨:៣០នាទីព្រឹក ថ្ងៃទី១៧ ខែសីហា ឆ្នាំ២០២៣ កម្លាំងមូលដ្ឋានកងរាជអាវុធហត្ថស្រុកជលគិរី សហការជាមួយគណៈបញ្ជាការឯកភាពស្រុក ចុះបង្ក្រាបបទល្មើសនេសាទនៅចំណុចដំណាក់ត្រាំក្របី ស្ថិតនៅឬស្សីដង្គួច ឃុំជលសាស្រុកជលគិរី ខេត្តកំពង់ឆ្នាំង ដោយបានរុះរើរបាំងសាច់អួនចំនួន០៦កន្លែង ប្រវែង ៦០០ម៉ែត្រ, លូសាច់អួនចំនួន ០៨គ្រឿង, របាំងស្បៃមុង ១៨កន្លែងប្រវែង ៧០០ម៉ែត្រ,លូស្បៃមុង ១៨មាត់, បង្គោលចំនួន ៧៥០ដើម, ចាក់លែងកូនត្រីចម្រុះចំនួន ២៧០គីឡូក្រាម ចំណែកសម្ភារត្រូវបានបំផ្លាញចោលនៅនឹងកន្លែង។

កណ្តាល៖ ដោយមានការដឹកនាំចង្អុលបង្ហាញផ្ទាល់ពីលោក ឧត្តមសេនីយ៍ មេបញ្ជាការខេត្ត និងមានការសម្របសម្រួលនីតិវិធីពីឯកឧត្តមព្រះរាជអាជ្ញាអមសាលាដំបូងខេត្តកាលថ្ងៃទី១៤ ខែសីហា ឆ្នាំ២០២៣ កម្លាំងកងរាជអាវុធហត្ថស្រុកអង្គស្នួល ខេត្តកណ្តាល បានចុះបង្ក្រាបករណីជួញដូរដោយខុសច្បាប់នូវសារធាតុញៀន ស្ថិតក្នុងឃុំបែកចាន ស្រុកអង្គស្នួល ខេត្តកណ្តាល ដោយបានឃាត់ខ្លួនជនសង្ស័យ០២នាក់ ភេទប្រុស និងបានចាប់យកវត្ថុតាងថ្នាំញៀន(ម៉ាទឹកកក) ចំនួន ០៤កញ្ចប់, ទូរស័ព្ទ ០២គ្រឿង។ បច្ចុប្បន្នជនសង្ស័យ និងវត្ថុតាងត្រូវបានសមត្ថកិច្ចកងរាជអាវុធហត្ថខេត្តកណ្តាល កសាងសំណុំរឿងបញ្ជូនទៅសាលាដំបូងខេត្តតាមនីតិវិធី។

ពោធិ៍សាត់៖ នៅវេលាម៉ោង៨:៣០នាទី ថ្ងៃទី១៦ ខែសីហា ឆ្នាំ២០២៣ កម្លាំងកងរាជអាវុធហត្ថខេត្តពោធិ៍សាត់ សហការជាមួយកម្លាំងចម្រុះថ្នាក់ជាតិ ដឹកនាំដោយលោក ឈិន តួ នាយរងអធិការរដ្ឋបាលជលផលខាងត្បូងបឹងទន្លេសាប បានចុះបង្ក្រាបបទល្មើសនេសាទនៅចំណុចលេខ នៅចំណុច(៣៤០០៧៨២-១៥១២៣១៥) ចាប់ពីឃុំកំពង់លួងរហូតដល់ចំណុចភូមិត្រពាំងរំដេញ ឃុំក្បាលត្រាច ស្រុកក្រគរ ខេត្តពោធិ៍សាត់ លទ្ធផលរិបអូសរបាំងសាច់អួន១៩ខ្សែ ប្រវែង៣១៥០ម៉ែត្រ ក្បាលបរចំនួន ១១គ្រឿង លូកងសាច់អួនចំនួន ៩មាត់ បង្គោលចំនួន ៧៥០ដើ និងចាក់លែងកូនត្រីចម្រុះចំនួន៧៥គីឡូក្រាមចូលបឹងទន្លេសាបវិញចំណែកម្ចាស់បានគេចខ្លួនបាត់។

មណ្ឌលគិរី៖ នៅថ្ងៃទី១៦ ខែសីហា ឆ្នាំ២០២៣ កម្លាំងមូលដ្ឋានកងរាជអាវុធហត្ថស្រុកកែវសីមា ខេត្តមណ្ឌលគិរី ដឹកនាំដោយលោកអនុសេនីយ៍ឯក ទ្រី ស៊ាងហ៊ុច សហការជាមួយកម្លាំងគណៈបញ្ជាការឯកភាពស្រុក នឹងដែនជំរកកែវសីមា ដឹកនាំដោយលោក តែម សុភ្រ័ក នាយករដ្ឋបាលស្រុកកែវសីមា បានចុះត្រួតពិនិត្យទីតាំងកាប់ទន្ទ្រាន ដីព្រៃដោយខុសច្បាប់ និងបានរុះរើផ្ទះចោលចំនួន (០១ផ្ទះ) នៅចំណុចutm (697281 1354633) នឹងទីតាំងថ្មី (៦៩៨៥២៨ ១៣៥៧៣៥១) ស្ថិតក្នុងភូមិពូគង់(៣៦) ឃុំស្រែព្រះ ស្រុកកែវសីមា ខេត្តមណ្ឌលគិរី។ ចំណែកម្ចាស់ផ្ទះគេចខ្លួនបាត់នជំនាញកំពុងស្រាវជ្រាវបន្ត។

កណ្តាល ៖ ថ្ងៃទី១៣ ខែសីហា ឆ្នាំ២០២៣ កម្លាំងមូលដ្ឋានកងរាជអាវុធហត្ថស្រុកស្អាង ខេត្តកណ្តាល បានចុះបង្ក្រាបករណីជួញដូរដោយខុសច្បាប់នូវសារធាតុញៀន ស្ថិតក្នុងឃុំព្រែកគយ ស្រុកស្អាង ខេត្តកណ្តាលដោយបានឃាត់ខ្លួនជនសង្ស័យ០១នាក់ ភេទប្រុស និងចាប់យកវត្ថុតាងពាក់ព័ន្ធមួយចំនួន។ បច្ចុប្បន្នជនសង្ស័យ និងវត្ថុតាងសមត្ថកិច្ចជំនាញបានកសាងសំណុំរឿង បញ្ជូនទៅសាលាដំបូងខេត្តតាមនីតិវិធី។

កណ្តាល៖ ថ្ងៃទី១២ ខែសីហា ឆ្នាំ២០២៣ កម្លាំងមូលដ្ឋានកងរាជអាវុធហត្ថក្រុងតាខ្មៅ ខេត្តកណ្តាល បានចុះបង្ក្រាបករណីជួញដូរដោយខុសច្បាប់នូវសារធាតុញៀន ស្ថិតក្នុងសង្កាត់ព្រែកឫស្សី ក្រុងតាខ្មៅ ខេត្តកណ្តាល ដោយបានឃាត់ខ្លួនជនសង្ស័យ០២នាក់ ភេទប្រុស និងចាប់យកវត្ថុតាងពាក់ព័ន្ធ។ បច្ចុប្បន្នជនសង្ស័យ និងវត្ថុតាងសមត្ថកិច្ចកងរាជអាវុធហត្ថខេត្តកណ្តាល បានកសាងសំណុំរឿង បញ្ជូនទៅសាលាដំបូងខេត្តតាមនីតិវិធី។

កំពត៖ នៅវេលាម៉ោង ២០ និង ៣០នាទី ថ្ងៃទី១៣ ខែសីហា ឆ្នាំ២០២៣ កម្លាំងជំនាញការិយាល័យប្រឆាំងគ្រឿងញៀន និង អង្គភាពនគរបាលយុត្តិធម៌នៃមន្ទីរស្រាវជ្រាវ និងបង្ក្រាបបទល្មើសកងរាជអាវុធហត្ថខេត្តកំពត សហការជាមួយកម្លាំងមូលដ្ឋានកងរាជអាវុធហត្ថក្រុងកំពត ដឹកនាំដោយលោកវរសេនីយ៍ឯក សេង វិច្ឆិកា មេបញ្ជាការរង ទទួលជំនាញគ្រឿងញៀន ។ កម្លាំងបានចុះបង្ក្រាបមុខសញ្ញាជួញដូរ ឬប្រើប្រាស់ដោយខុសច្បាប់នូវសារធាតុញៀន នៅចំណុចភូមិ១ឧសភា សង្កាត់កំពង់កណ្តាល ក្រុងកំពត ខេត្តកំពត ដោយបានឃាត់ខ្លួនជនសង្ស័យបានចំនួន០១នាក់ និងចាប់យកវត្ថុតាងពាក់ព័ន្ធមួយចំនួន។ បច្ចុប្បន្នជនសង្ស័យ និងវត្ថុតាងត្រូវបានមន្ត្រីជំនាញកងរាជអាវុធហត្ថចាត់ការតាមនីតិវិធី។

កំពង់ស្ពឺ៖ កាលពីវេលាម៉ោង ម៉ោង១៦:៣០នាទី ថ្ងៃទី១៣ ខែសីហា ឆ្នាំ២០២៣ ការិយាល័យព្រហ្មទណ្ឌ បានទទួលជនសង្ស័យម្នាក់ពីមូលដ្ឋានកងរាជអាវុធហត្ថស្រុកគងពិសី ពាក់ព័ន្ធនឹងករណីធ្វើឱ្យខូចខាតដោយចេតនា ប្រព្រឹត្តកាលវេលាម៉ោង ០១ :៣០នាទី ឆ្លងចូលថ្ងៃទី១៣ ខែសីហា ឆ្នាំ២០២៣ នៅចំណុចក្រុមហ៊ុនអារ៉ូម៉ា ៩៩៩៩(ភោជនីយដ្ឋាន និងខារ៉ាអូខេ) ស្ថិតនៅក្នុងភូមិស្វាយ ឃុំស្រង់ ស្រុកគងពិសី ខេត្តកំពង់ស្ពឺ ។ ក្រោយពីធ្វើការសាកសួរជនសង្ស័យបានសារភាពថាខ្លួនបានផឹកស្រាវឹងវាយបំផ្លិចបំផ្លាញសម្ភារក្រុមហ៊ុនពិតប្រាកដមែន ៕

បន្ទាយមានជ័យ៖ នៅវេលាម៉ោង១៥ និង២០នាទី ថ្ងៃទី១១ ខែសីហា ឆ្នាំ២០២៣  កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ដឹកនាំដោយលោកវរសេនីយ៍ត្រី នួន  នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង បានឃាត់ជនសង្ស័យម្នាក់ករណី លួចមានស្ថានទម្ងន់ទោស (ឆក់កាបូប) ប្រព្រឹត្តកាលពីវេលាម៉ោង០៣ និង០០នាទីយប់ចូលថ្ងៃទី១១ ខែសីហា ឆ្នាំ២០២៣ នៅចំណុចមុខកាស៊ីណូកាឡាក់ស៊ី ស្ថិតក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។ បច្ចុប្បន្នមន្ត្រីជំនាញបានបញ្ជូនជនសង្ស័យទៅសាលាដំបូងខេត្តចាត់ការតាមនីតិវិធី។